Shillong, Risaw 22 : Kum shi bynta ban plie lad ïa la ki khun samla ba don ïa ka sap ne pyrshang ban long ki nongïalehkai badminton kiba kynsai, ka Lumparing Sports Club ryngkat ka jingïatrei lang bad ka District Sports Promotion Society, East Khasi hills, District ka la lah ha kaban pynlong ïa ka Badminton Tournament kaba ka phang pdeng ka jong ka, ka dei Smash, Serve, Win.
Ïa kane ka jingïakob, la pynlong naduh ka 17 haduh ka 21 tarik mynta ka taiew, ha Indoor Stadium, ka Lumparing Sports Club.
Ïa kane ka jingïakob la pynlong d aka jingphïah ïa ki kyrdan ïalehkai bapher bapher, kaba kynthup ïa ka U-14, U-16, U-18, ha kaba la wan ban ïashim bynta lang ruh wat da ki khynnah ne ki samla ïalehkai na ki jylla ba marjan bad ka thain shatei lam mihngi.
Ha kaba kut jong kane ka jingïakob, ki nongjop ha ki kyrdan ïakhun kat kumba la phiah ïa ki, ki long U-14 ki kynthei nongjop dei Tezayah.B.Jyrwa, ba wan ba-ar Anjali Sharma, katba ha ka liang ki shynrang pat nongjop dei u Abraham Debbarma ba wan ba-ar Nilesh Jha.
Ha ka U-16 pat na ka liang ki kynthei, nongjop dei Josie Hadem, ba wan ba-ar pat dei ka Tezayah.B.Jyrwa, bad na ka liang ki shynrang pat nongjop dei u Haegan Diengdoh ba wan ba-ar Mousum Hiloidari.
Ha ka U-18 pat, ïa ka nam lahduh la rah da ka Josie Hadem ba wan ba-ar Kiipa Paotei, bad na ka liang ki shynrang nongjop dei u Thungnam Maimai ba wan ba-ar dei u Mousum Hiloidari
Katba ha ka jingïalehkai ba shijur ne doubles ki khynnah shynrang ka nam jop ka leit sha u Ruzevo bad u Sewang bad ba wan ba-ar dei u Aryan bad u Shubham.
U Kongsan ba la wan ban ïadon lang ha ka jingpynkut ïa kane ka jingïakob dei u MDC ka Laban -Mawprem Constituency u bah Ricky Shullai, ryngkat u vice president ka Meghalaya State Badminton Association u bah P. Laloo, bud pat sa ki dkhot nongkit kam ka Lumparing Sports Club.
Ha kaba kut jong ka jingïakhun, la pynbud pat da ka jingsam ïa ki khusnam ba kynthup ïa ki trophy bad ka song pisa.
