Ba pyrshah ïa ka Ropeway Project shah byrngem u Chairman ka Green Tech Foundation lyngba ka phone
“Bah hato phin dang mih surok ne em ?”
Shillong, Risaw 21: Hato ka jylla ka la kylla long kumta ka jylla kaba don ki nongbyrngem ne nongpynbor lada ki nongshong shnong kim kwah, kane ka la paw ha ka sngi Balang haba ki nongïalam jong ka Joint Action Committee ba pyrshah ïa ka jingtei ïa ka Shillong Peak Ropeway project bad u Chairman ka Green Tech ki la shah byrngem byrsit, bad la ïathuh ba ka la don ruh ka jingpyrshang ban ong ïa ki ban ujor FIR.
U Bah H B Nonglang Chairman ka Green Tech Foundation haba kren sha ki lad pathai khubor ha Shillong Press Club ha ka sngi Balang u la ong, “Ngim sngewphylla shuh naduh ka por ba ngi shim ïa ka kam jong u Lum Pongdeng, ha ka por jong ka Markham bad kiwei, ngi ïoh ki phone call, kaba nyngkong ki ong bah long ban ïakren ne em ban ïapynbeit bad kaba ar pat ki ong bah phi dang mih surok ne em. Kane kadei ka jingmlien bad kynmaw bha ba kane ka dei ka ri bad ka jaitbynriew jong ngi, U Blei u tip bha bad phim donkam ban maham ne byrngem byrsit namar ngim dei ki khyllung khynnah ban sngap ïa kita, tangba lada ka por ka dawa ngin sei lut ïa kita ki jingshisha baroh.”
“Na ka liang jong ngi, ngi phah tang kawei ka khubor sha ki bad kata ka long ba katta phi nang pynslem, katta ngin nang sei madan, katta nang ai ding katta ngin nangtih jylliew ïa kane ka mat bad lada jia eiei phin hap shim ka jingkitkhlieh. Ka sorkar kadei ban wengnoh ïa kane ka project, pynkynriah sha ka jaka kaba dei ban pynkynriah,” ong u Chairman ka Green Tech u Bah H B Nonglang.
U la ong ba ki kwah ban ong tang kawei ba ki jingshah byrngem kin wan, ki jingshah file FIR, kam lei lei hynrei ki la ong ba katba nang pynslem yn dang shah sei madan namar ki dang bun kiei kiei.
“Kan sa poi ka por ba ngin leit kiew biang sha ka Iingkashari National Green Tribunal (NGT), sha ka Meghalaya High Court bad kiba donkti kin sa ngat ha ki jingeh kiba bun rukom naba ki la pynkheiñ ïa ki kyndon bad ki hukum kine ki ïingkashari,” ong u Chairman ka Green Tech Foundation.