Na ïew Umjaraiñ lap ïa kawei ka met ïap jong uwei u rangbah uba la 50 snem karta

Mawkyrwat, Nailur 09 : Kawei ka metïap jong u rangbah briew la lap ba u thiah harud surok ha ïew Umjaraiñ, South West Khasi Hills District ha ka por kumba 7:30 mynstep jong ka sngi balang 9 tarik u ‘Nailur, 2026.
Ha ka tyllong khubor na u bah B. Jyrwa, MPS, Superintendent jong ki Pulit ka South West Khasi Hills District ula ïathuh ba u ba briew uba la ïap la tip kyrteng kum u (L) Nobartis Sohphoh, uba la kynjoh ka rta kumba 50 snem, uba shong basah ha shnong Mawsdei, South West Khasi Hills District.
Hadien ba la ïoh jingtip shaphang kane ka jingjia, u bah B. Jyrwa u la ong ba la pynlong mardor ïa ka inquest proceedings ne pynlong ïa ki jingtohkit kiba donkam halor kane ka kam. “Hadien kata, la pynkit ïa ka metïap sha Civil Hospital, Mawkyrwat, na ka bynta ban leh ïa ka post-mortem examination bad kiwei pat ki rukom treikam kiba donkam”, ong u SP.
Shuh shuh la bthah ïa kiba ha ïing ha sem jong u ba ïap ban ai ïa ka ehhajar ne FIR, khnang ban pynrung ïa ka Unnatural Death (UD) Case bad ban pynlong ïa ka jingtohkit kaba bniah halor kane ka jingjia.