Shillong, Nailur 9: Ka tnat Labour, Employment and Skill Development jong ka sorkar Meghalaya ha ka sngi Balang ka la pynlong ïa ka state launch-cum-orientation prokram halor ka kyndon ba la pynkylla ha ka jylla Meghalaya Identification, Registration, Safety and Security of Migrant Workers (MIRSS), 2020.
Ïa kine ki kyndon ba la pynkylla la pyllait paidbah da u Myntri ka tnat Labour u Bah Methodius Dkhar ha ka por ba la pynlong ïa ka prokram launch-cum-orientation kaba la pynlong da ka tnad Labour, Employment and Skill Development ha State Guest House, Tara Ghar.
Haba kren, u Bah Methodius Dkhar u la ban jur ïa ka jingdonkam ban don ka jingiatreilang hapdeng ki pulit, ki bor pyniaid district, ki nongai kam, ki contractor, ki trade union, ki seng bhalang bad ki nongtrei bylla na ka bynta ban pyntreikam hok ïa ka rukom treikam kaba thymmai.
U la ong ba ka tnad Labour kan don ka bynta kaba pdeng ban pynthikna ba ïa ki kyndon jong ka ain bad ki kyndon yn pynsngewthuh bad pyntreikam hok ha baroh kawei ka jylla.U la ithuh ïa ka jingpynsngewthuh, ka jingpynsuk, ka jingpeit bniah bad ka jingpyntreikam kum ki saw tylli ki bynta ba kongsan ban phai khmat.
U Bah Dkhar u la khot ruh ïa ki Deputy Commissioner bad ïa ki ophisar kiba don ha ki District ba kin iatreilang bad ki ophisar jong ka tnad Labour khnang ban pynthikna ïa ka jingpyntreikam hok ïa ki kyndon ba la pynkylla.
Halor ka bynta jong ki pulit, u Myntri u la ong ba ka rukom treikam ba la pynkylla ka ailad ïa ka jingiatreilang kaba kham jan hapdeng ki bor pulit bad ki heh jong ka tnad labour.Ki jingujor kiba ïadei bad ka jingshah lehbein, jingshah pyntieng, jingshah pynthut, ka jingshah byrngem bad ka jingshah pynmynsaw ha ka met ne kiwei kiwei ki kam beain pyrshah ïa ki nongbylla sngi, u la ong ba dei ban rejistar kloi, ban tohkit bad ban leh katkum ka ain.
Shuh shuh u la ban jur ïa ka jingdonkam ban don ka jingiatreilang hapdeng ka Meghalaya bad ki jylla na kiba ki nongbylla sngi ki wan, khamtam ha ki kam ban ithuh, pynshisha, ai jingiarap kyrkieh bad ka jingbha jingmiat.
U Bah Dkhar u la ong ba ki nongpyntreikam, ki kontraktor, ki karkhana bad ki jaka treikam ki dei ban ithuh ïa ka jingkitkhlieh jong ki ïa ki nongbylla sngi bad ban pynthikna ïa ka jingshngain jong ki bad ki ban ioh ïa ki jingmyntoi bad ki jingïada kiba don katkum ki kyndon jong ka sorkar.
Haba pynpaw ïa ka jingnoh synniang jong ki nongbylla sngi ha ka ioh ka kot jong ka jylla, u la ong ba ki trei ha ki katto katne ki bynta, kynthup ïa ki kam shna ïing, ki jingtei bapher bapher, ka koit ka khiah bad kiwei kiwei.
U Myntri sorkar u la ong ba ka jingpynrung kyrteng kaba biang ka long kaba donkam bha namar kan pynlah ïa ka sorkar ban tip shano ki nongbylla sngi ki trei bad ban ïarap ïa ki ha ka por ba don ki jingeh.Hynrei u la maham ba ka jingpynrung kyrteng kam dei ban long ka atiar ban pyndik ne ban thaw jingkhanglad ki bym donkam ïa ki nongtrei bad ki nongpyntreikam.
U la ban jur ruh ba ka rukom pynrung kyrteng ka dei ban burom ïa ka jinglong kyrpang bad ka burom jong ki nongtrei, ha kaba ïa ki jingtip ba la lum dei ban pyndonkam tang na ka bynta ki jingthmu paidbah kiba dei hok bad ban pynïaid da ka jingkitkhlieh.
Ha kane ka prokram, u Bah Dkhar u la pyllait ruh ïa ka MIRSS Amendment Rules, ka e-payment gateway na ka bynta ban siew ïa ki kuna, bad ka Standard Operating Procedure (SOP) ban pyntreikam ïa ka MIRSS Amendment Act bad Rules.
