Ban don noh la ka jong ka thup kyrteng thep vote ha ka election sha GHADC

TURA, Risaw 2: Ki seng bhalang bapher bapher na Tura bad West Garo Hills ki la pdiang sngewbha ïa ka jingmynjur jong u Lat ïa ki jingpynkylla kiba pynbiang ïa ka thup nongthep vote la ka jong na ka bynta ka Garo Hills Autonomous District Council (GHADC) bad pynpaw ruh ïa ka jingsngewnguh ïa u Myntri Rangbah ka Jylla Meghalaya u Conrad K. Sangma, ka Executive Committee kana mynta jong ka GHADC, u Lat ka jylla u C. H. Vijayashankar bad ïa ki paidbah ha ri lum Garo.
Haba pdiang sngewbha ïa kane ka jingjia, ki seng bhalang ki la ai ka jingïaroh ïa ka jingtrei shitom jong u Myntri Rangbah ka Jylla u Conrad K Sangma bad ka Executive Committee ba mynta jong ka GHADC ban rah ïa kane ka kam shakhmat.Ki la ai khublei ruh ïa u Lat ka jylla u Vijayashankar uba la ai jingmynjur ïa kane ka jingpynkylla.
Ki seng ki la pynpaw ka jingsngewnguh ïa ki paidbah ka Garo Hills kiba la bteng ban kyrshan, ïaishah bad ïashim bynta lang ha kane ka mat kaba la slem bha, da kaba batai ïa ka jingroi kum ka jingmih na ka jingïatreilang jong ki bynta bapher bapher jong ka imlang sahlang.
Shuh shuh ki la ai khublei kyrpang ruh ïa ki nongïalam balang ha kylleng ka Garo Hills na ka bynta ki jingduwai bad jingkyrshan jong ki, da kaba ong ba ki jingduwai jong ki nongïalam balang bad ki paidbah Khristan ki la long ka lad ai mynsiem kaba kongsan ha baroh kawei ka jingïaid lynti.
Ki seng bhalang ki la ong, kane ka jingmynjur ka dei ka jingkylla kaba khraw ha ka rukom jied nongmih khmat jong ka GHADC bad ki la pynpaw ka jingkyrmen ba ki kyndon thymmai kin pynkhlain ïa ka jingtreikam jong ka Autonomous Council bad kin ïada ïa ka riti synshar hi jong ka jaitbynriew.
U Lat ka jylla u Vijayashankar u la ai jingmynjur ïa kane ka jingpynkylla ha ka 29 tarik Nailur, 2026, hadien kane ka sorkar Meghalaya ka la pynbna ïa ki kyndon ba la pynkylla ha ka Gazette jong ka jylla.Ki jingpynkylla ki pynbiang ïa ka thup nongthep vote ba la ka jong na ka bynta ki elekshon GHADC, pynlong ïa ka syrnoad Scheduled Tribe kaba kongsan ïa ki nongthep vote bad ki kyrtong, bad pynduna ia ka rta thep vote na ka 21 snem sha ka 18 snem.
Ki seng bhalang ki la pynkut da kaba ai khublei ïa ka sorkar, ka Executive Committee jong ka GHADC, u Lat, ki nongïalam Balang bad ki paidbah jong ka Garo Hills, da kaba batai ïa ka roi ka par kum ka jingmih na ka jingïatreilang kaba neh, lynngba ka jingkyrshan bad ki jingduwai.