Asian Games: Jop takma ksiar ka Kumkum, ka Pranavi, u Aman bad ka kynhun ïalehkai kriket ki shynrang ka India

JAPAN, Risaw 03: Ka India ka la ïai bteng ïa ka jingkiew jong ka ha ka miej jingkheiñ khur takma ha ka Asian Games 2026 ha ka sngi Saitjaiñ, 03 tarik u Risaw, ha kaba ka nongsiat khnam kynthei jong ka ri, ka Kumkum Anil Mohod ka la wanrah sha la ïing ïa ka takma ksiar ba nyngkong eh jong ka ri ha ka ïakop siat khnam Recurve jong ki kynthei ba marwei bad ha kajuh ka por ka la pynthikna ïa ka bhah ban ïoh ïashim bynta ha ka Olympic.
Ka Kumkum ka la pynliem noh ïa ka Oh Yejin jong ka South Korea da 6-5 ha ka shoot-off hadien ba ka jingïakhun ïaknieh takma ksiar ka la ïakhaid mar 5-5.
Ha kawei pat ka liang, ka Pranavi Urs ka la kylla long ka kynthei nong India kaba nyngkong eh ban khur ïa ka takma ksiar ha ka jingïalehkai Golf ki kynthei jong ka Asian Games.
Nangta ka kynhun kriket ki shynrang jong ka ri India, ka la pynneh pynsah ïa ka nam lahduh jong ki ha ka jingïalehkai kriket jong ka Asian Games da kaba jop pyrshah ïa ka Pakistan da 19 ron ha ka jingïakhun phainal ha Nisshin ha ka sngi Saitjaiñ, kaba la bynrap sa kawei ka takma ksiar ha kane ka lympung bah ha Aichi-Nagoya, Japan. Kane kadei ka takma ksiar kaba 19 jong ka India ha kane ka sienjam kaba dang ïaid shakhmat.
U Neeraj Chauhan u la ïoh ban khur ïa ka takma rnong ha ka jingïakop siat khnam Recurve jong ki shynrang hadien ba u la lah ban pynliem noh ïa u para ri u Dhiraj Bommadevara ha ka jingïakhun ïaknieh takma rnong.
Ka India ka la khur ruh ïa ka takma ksiar ha ka jingïalehkai ïalympat, ha kaba u Aman Sehrawat u la pynkyndit da kaba pynliem ïa u lahduh ka pyrthei (World Champion) u Han Chong-song da 11-7 ha ka phainal jong ka Men’s 57kg wrestling.
^Tad haduh kane ka khubor, ka India ka don mynta ha ka kyrdan ba san ha ka miej jingkheiñ khur takma da kaba jop 82 tylli baroh: 20 tylli ki takma ksiar, 26 tylli ki rupa bad 36 tylli ki rnong.