Sat sia ka ALO ba shah kynthoh ‘Lyngngam Bam Briew’, ujor da ka ejahar sha ki pulit

Nongstoiñ, Risaw 02: Ka All Lyngngam Organisation (ALO) ha ka sngi thohdieng 2 tarik Risaw 2026, hapoh ka jingïalam u Dr. Bostick Mawsor kum u Lamphang, ka la leit ban ujor da ka ejahar ha Nongstoiñ Police Station pyrshah ïa ki ar ngut ki briew kiba la tip kyrteng kum u Melansius Sangriang bad u Mikil Wahlang, kiba la kynthoh lyngba ki rynsan social media ïa ka jaidbynriew Lyngngam da kaba kynnoh ba ki Lyngngam ki dei ki nongbam briew.
Ka jingmih ki jingkynthoh ba bun jait ha kine ki sngi ki la mih ha ki social media hadien ka jingjia shah pynïap ki shikurim kaba la jia ha kine ki sngi ha Nongjri kumba la paw ha ki lad pathai khubor.
Ka seng ka la pynpaw ïa ka jingsngewlem bad ka jingsngewsih kaba jur ïa kaei kaba la jia ïa ki shijur kiba la shah pynïap ha ka thaiñ Nongjri. Hynrei, ban kynthoh ïa ka thaiñ bad ïa ka jaidbynriew baroh kawei, ka long ka bym lah ban pdiang, namar kane ka wanrah ïa ka jingïasngewpher thaiñ bad ka sngewpher jaidbynriew.
Kumta khnang ba nangne shakhmat kum kitei ki briew kin ym mlien shuh ka seng ka la ai da ka ejahar.
U samla Bendrowell Hashah kum u pyndap phang ka ALO, u la ong ba ka jingkynthoh jong kitei ki briew ka dei ka jingthmu ban pynïashrut para marjan bad ban pharia ïa ka jaidbynriew Hynñiewtrep, na kata ka daw ym banse ban ai jingsneng ïa kitei baroh arngut da ka ejahar.