Haduh u Nailur 2026, ka jylla Meghalaya ka la lah ban sam um kor kumba 5.47 lak tylli ki tnum ïing

Shillong, Risaw 02: Ka tnad sam um ka sorkar jylla Meghalaya ka la pyndep ïa ka jingrakhe ïa ka Jal Aman ha kylleng ki skhim ba don haduh 75 tylli ki kor sam um ha kane ka jylla, ha kaba ka la long ruh kawei na ki jingrakhe bakhraw jong ka Jal Arpan kaba la pynlong tang ha ka jylla Meghalaya.
Ïa kane ka jingrakhe kaba la pynlong ha ki kylleng ki distrik bad ki division ha ka 1 tarik bad 2 tarik Risaw 2026, kala long ka jingnoh synniang lang ka imlang ka sahlang kaba lamkhmat ha ka ban pyndep ïa ka jingsam um sha ki paidbah ka jylla Meghalaya.
La don ka jingiashim bynta jong ki nongshong shnong ka imlang ka sahlang, ka Village Water and Sanitation Committees, paidbah, ki khynnah, ki heh nongtrei bad ki bor pyniaid jong ka tnad PHE, ha kaba kane ka pyni ruh ia ka jingkut jingmut jong ka jingpynioh ia ka um bam um dih kaba shngain ban dih na ka bynta baroh.
Kane ka pyni ruh ia ka jingtrei shitom jong ki imlang ka sahlang bad ki jaka pule sorkar ha kaban pynskhem iaka jingshngain ka um dih ha ki jaka nongkyndong.
Ki 75 tylli ki skhim ki don ïa ki rukom sam um kiba thymmai, ki buit pynthymmai ha ka rukom sam um ha ki jaka nongkyndong kiba mynta ki long ki imlang ki sahlang kiba pyrkhat ïa ka bha ka miat jong ka jylla. Kane ka jingpyndep sam um la dei ka kam ba bteng ba hap hapoh ka Jal Jeevan Mission, kaba long ruh ka jingiar ban pynïoh um kor hapoh tnum iing ha kylleng ki jaka ha nongkyndong.
Tad haduh u Nailur 2026, ka jylla Meghalaya kala lah ban sam um kor kumba 5.47 lak tylli ki tnum iing, kaba pyni ia ka jingpyndep haduh 84 persen ban sam um kor ha kane ka jylla. Haba bynrap, la don 6,195 tylli ki skhim jong ka Jal Jeevan Mission na ka 7,795 tylli kiba la lah ban pyndep.
Ka tnad sam um ka neh ban kular ban pyntreikam ia ka jingsam um kaba hap hapoh ka Jal Jeevan Mission 2.0 da kaba pynthikna ban ioh ia ka um bam um dih ba shngaiñ ban dih na ka bynta ki shnong ha ki jaka nongkyndong.