Shillong, Rymphang 18 : U MLA ka Shillong North ba dang shu dep resaiñ shen, Bah Adelbert Nongrum u la ong ba ym dei mano mano ruh ba lah ban wanrah ka jingkylla namar kadei kaba mih beit na ki paidbah hi lada ki kwah shisha ïa ka jingkylla.
Haba kren ïa kane ha ka jingïalang pynshai paidbah ne common platform ba pynlong da ka Dorbar Shnong Wahingdoh, utei u kyrtong ka VPP u la ong, “Ka jingkylla mynta dei na phi hi shimet shimet ym dei nangn nangno ruh. Lada phi kwah ban kylla ban myntoi shimet ruh kan kylla bad lada kwah ban wanrah jingkylla na ka bynta ka lawei jong ka longdien ruh kan wan ka jingkylla,” u la ong.
Shuh shuh u ong ruh ba watla u don ha ka sorkar hynrei u ïai pyrshah beit ïa ki kam jong ka kiba u sngew ba ki long pyrshah khamtam haba ïadei bad ka kam bamsap. Kumta u ong ba dei na kane ka daw ba la mih ka VPP ban thaw ïa ka sorkar kaba khuid bad kaba shai kaba don ruh ïa ka thong ban wanrah ïa ka jingmyntoi.
U ong ruh ba kum u nongmihkhmat un dang ïai bteng ban rah ïa ki ishu kiba ïadei bad u paidbah khamtam haba ïadei bad ka jingpyrshang ban pynkynriah noh ïa ki briew kiba sah ha Them Iewmawlong sha kawei pat ka jaka.
Shuh shuh u ong ruh ba kum u nongmihkhmat u la pyrshang lut ki lad ki lynti ban pyntreikam hok ïa ki kam pynroi watla kadei ha ka por ba don ka khlam COVID.
