Nongpoh, Risaw 30 : Ban shim ïa ka jingkitkhlieh lang na ka bynta ban ïalap halor ka jingma kaba ktah na ka jingkynreiu drok bad ka jingkyrni ha ka kyiad kaba la pynjot ïa bun ki longïing longsem bad ki khun samla, ka Hynñiewtrep National Youth Movement (HNYF), Sengkmie ryngkat ka World Vision India Ri Bhoi Area Development Programme ha ka 24 tarik u Risaw 2022 ka la pynlong ïa ka prorkam ban ai jinghikai kyrpang shaphang ka jingktah u drok bad ka kyiad na ka bynta ki khynnah skul bad ki nongshong shnong ka shnong Mawbseiñ ba hap hapoh ka Raid Madan Kyrdem.
Ïa kane ka prokram ai jinghikai halor ka jingma jong u drok bad ka kyiad la pynlong ha St. Joseph’s Secondary School, Mawbsein, Lum Mission ha kaba la wan shim bynta da u President ba rangbah ka seng HNYM, u Bah Lous Dohtdong, u Working President, u Bah Donald Syiemlieh, ka Medical Officer ka Kyrdem PHC, ka Dr. S. Rapsang, u Officer Incharge ka Khapmara PIC, u Bah P. Thabah bad kynthup ruh naduh ki nongïalam Shnong, ki rangbah, ki khynnah skul bad ki paidbah ka Shnong Mawbsein Lum Mission.
Ïa kane ka prokram ai jinghikai la kyrshan lang ruh da ka jingdon ki nongïalam ka HNYM Raid Madan Kyrdem Circle bad ka Raid Ïapngar Circle. La pynïaid ïakane ka prokram ai jinghikai da u bah Deversing Mukhim, Vice President HNYM Raid madan Kyrdem bad la kren pdiang sngewbha da u Bah Fedric Laloo President HNYM Raid Madan Kyrdem Circle.
Naduh u President ba rangbah ka HNYM, u Bah Lous Dohtdong, ka Medical Officer, ka Dr. S. Rapsang bad u Bah P. Thabah, haba kren ha kane ka prokram ai jinghikai, ki la ban khia ïa ki khynnah skul, ki samla bad ki kmie ki kpa ba ki dei ban long kiba peitngor ban lait na ka tyrsim jingjot jong u drok bad ka kyiad.
Kitei ki nongkren ki la kren shibun ki bynta ba ka kyiad ka la pynjot ïa bun ki longing longsem na ka daw ka jingkyrni u kpa ne ki khun ïa ka kyiad bad mynta lei lei ka jingma ka ap na ka jingkynrei u drok ha kaba lada ngim peitngor ka long ka jingma ïa ki khun ba u drok u la rung mynta ym tang ha ki jaka sor bad u la poi ruh wat sha ki shnong nongkyndong.
Namarkta, kitei ki nongkren ha kane ka prokram ki la ban khia ba dei ban kiar rai maw rai ding na ka kyiad bad u drok bad ngi dei ruh ban don ka jingïatrei lang na ka bynta ban pynduh jaid ïa kine ki jingdih ba sniew bad kiwei kiwei ki kam sniew kiba ktah ïa ki khun samla, ïa ka longïing longsem bad wat ïa ka imlang ka sahlang, ha kaba lada ngi don kata ka jingïatrei lang ngi lah ban rad dyngkhong ïa kine ki jingdih basniew bad kiwei kiwei ki kam sniew, ki la bynrap.
