Nongpoh, Risaw 26: U Deputy Commissioner ka Ri-Bhoi u Dr Abhishek Saini mynta ka sngi u la khot ïakren ïaka seng Khasi Student Union hadien ka jingleit ujor ka seng dang shen haba ïadei bad ka jingthud palat ka bording haka thaiñ Nongpoh bad kiwei de ki shnong kiba don mar khap bad ka sor Nongpoh.
Ha katei ka jingïalang naka liang u DC u la khot ruh ïaki ophisar ka MePDCL ka Umiam, Nongpoh bad Byrnihat Division ban ïakren haba ïadei bad kane ka jingeh kaba ki paidbah ki ju mad naka por shaka por.
Haba kren sha ki lad pathai khubor naka liang u Bah Ferdinald Kharkamni President ka KSU North Khasi Hills District lem bad u Samla Baishanlang Kharshanlor kila ong ba kane ka dei ka mat kaba la slem ba ka KSU kala pynsngew bad haki snem bad hadien ka jingujor bad pynkynmaw biang ka seng naka liang u DC mynta ka sngi u la khot ïakren ïaka KSU lyngba ka Nongpoh Circle halor ka jinglip khah khah jong ka bording bad haba ioh ban ïakren ka daw hi kaba la mih ka dei namar ka jingjur lyer palat haki lynti ïaid jong ka bording naduh ki thaiñ Umsning bad ka jingbun jong ki dieng ki siej kiba hap bad kah.
Shuh shuh kila pynkynmaw ruh ba kane ka mat ka dei kaba la pynsngew naduh u snem 2012, ha kaba la thaw ruh ïaka Co-ordination Committee hapdeng ki sengbhalang, ki nongïalam shnong hapoh ka jingïalam u Bah GH Kharshanlor (Bam Kwai ha dwar u Blei) kum u Chairman bad u Bah Ferdinald Kharkamni kum u Secretary lem bad ki Rangbah Shnong bad ha kitei ki snem la pynlong ruh da ka rally haka thaiñ Nongpoh namar ka jingthud palat ka bording bad ka ingshah pyndik khamtam ki khynnah skul kiba pynkhreh ïaki eksamin bapher bapher, nalor kiwei kiwei ki kam ba ju pyndonkam man ka sngi.
Kum ki nongïalam kila pynpaw ruh ka jingsngewtynnad ha katei ka jingïakren naka liang ka MePDCL kala kular ban shimkhia ïa kane ka jingeh bad khamtam ban weng ïaka jingpynlip light haka sngi Saitjaiñ naduh ka por mynstep haduh ka por janmiet kaba la pynthud shisha ïaki kam ki jam bad khamtam ki samla pule kiba pynkhreh ïaki eksam bapher bapher.
Shuh shuh lyngba kane ka jingïalang naka liang ki ophisar kila pynsngew ruh ba ka jingpyndep ïa u 132/33 KV Sub-Station ka dang ïaid shakhmat bad khmih lynti ba shen yn sa lah ban pyndep noh ha u bnai Kyllalyngkot lane Rymphang jong u snem ban wan khnang ba yn weng noh ïaka jinglip bording khah khah haka thaiñ Nongpoh.
