Leit khang khyrdep ka KHADC ïa jingtrei ka company ba pyntrei ïa ka Ropeway Project ha Lum Shyllong

Shillong, Risaw 27: Ka KHADC lyngba ka Tnat Trade, hapoh ka jingïalam jong u CEM u Bah Winstons Tony Lyngdoh, ki dkhot ka KHADC, ki pulit Enforcement ki la leit ban khang khyrdep noh ha ka sngi baar ïa ki ophis, ki tiar ki tar bad baroh ki jingtreikam jong ka Company Meghalaya Ropeway Development Authority ba pyntrei ïa ka Shyllong Peak Ropeway Project kaba hab hapoh ka Riat Laban pyllun.
Kane ka jingleit ban khang khyrdep ka la long hadien ba ka company kaba pyntrei ïa kane project ka la leh bym suitñiew ïa ki jingai por kaba lah arsien ka KHADC ba kadei ban pynbiang lut ïa ki kot ki sla bad ba kam dei ban pyntrei ïa ki kam kat bym pat ïoh ïa ka laisen khaïi na KHADC.
Halor kane haba kren sha ki lad pathai khubor u CEM ka KHADC u Bah Winstons Tony Lyngdoh u la ïathuh ba ka jingkhang ïa kane ka jaka pyntrei Ropeway Project ka long hadien ba ka company kam shym la sngap ïa ka jingai por ka KHADC kaba la phah ban pyndep ïa baroh ki jingdonkam naduh u bnai Jymmang bad kumjuh ha u bnai Nailur.
U la ïathuh ba watla kane ka company ka la ong ba kan pyndep ïa baroh ki jingdonkam hynrei haduh mynta, kam pat lah ban pynurlong, katba ki kam pat ka la pyntrei shakhmat.
Kumta u ong ba la ai por biang ïa kane ka company ba dei ban kohnguh ïa ki jingai por ka KHADC bad katba kam pat lah ban pynbiang lut ïa ki kot ki sla baroh kan ym lah ban pynïaid shakhmat ïa kino kino ki kam.
U la pynpaw ruh ka jingsngew khia ba bun na ki company ki ïuh roit barabor ïa ki trai ri trai muluk watba kim pat ïoh kino kino ki kot ki sla kiba biang.
Na ka liang jong u, u la ong ba na ka liang ka KHADC kan ym ailad satia ïa kino kino ki company ne ki riew shimet kiba kwah ban leh kino kino ki kam khaïi ne ki kam tei jingtei khlem da bud ïa ki kyndon jong ka aiñ Trading by non-tribal Act bad na ka liang ka Council kan leit ban khang khyrdep lada ki ïaid lait ïa kine ki jingbthah jong ka KHADC.
Lah ban pynkynmaw ba ka Joint Action Committee kaba pyrshah ïa ka jingtei ïa ka Shyllong Peak Ropeway, kaba dang ïaid mynta halor ka jingsngewkhia na ka jingpom ïa ki dieng kiba lah ban ktah ïa ka tyllong umbam umdih kaba la ïoh na une u Lum Shyllong.
Na ka liang ka JAC ka la leit teng ruh ha ki por ba la dep ban leit kynduh ïa u CEM ka KHADC ban pynsngew halor ka jingbym pat ïoh laisen khaïi jong katei ka Company bad kumjuh ruh ka jingbym pat ïoh ïa ka NOC napoh ka ophis jong u Syiem ka Hima Mylliem bad ka JAC ka la ïaid shakhmat ruh ban pynlong ïa ka jingïaid rally kaba jai jai kaba la sdang na Last Stop shaduh ka jaka ba la pyntrei ïa kane ka Project bad kane ka mat mynta ka dang long hi kaba dang ïaid ha ka jingïakren hynrei na ka liang ka JAC kam lah pat ban pdiang ïa ki jingkam bad jingpynshai jong ka sorkar halor ki kam ba ïadei bad kane ka Ropeway Project.