Kat u Symbud Myntri Rangbah u kren da ki ktien ba pynjah burom ïa ki nonghikai: Bah Ardent

Dawa ka VPP ïa u Bah Prestone Tynsong ban hiar shuki

0

Shillong, Naiwieng 18 : Ka Voice of the People Party (VPP) hynne ka sngi Balang ka la ong ba ka jingkren beiñ jong u Symbud Myntri Rangbah ka Jylla, Bah Prestone Tynsong ïa ki nonghikai kam ïahap tang ban shu panmab hynrei ka la dei beit ïa u ba un hiar shuki.
Haba kren bad ki lad pathai khubor na ka liang u President ka VPP bad MLA ka Nongkrem Bah Ardent Miller Basaïawmoit u la pynrem jur ïa katei ka jingkren bad ong ba kum ki nongmihkhmat paidbah ki sngewlehraiñ hadien ba la phriang katei ka jingkynthoh pyrshah ïa ki nonghikai kum ki ‘kruiñ’.
Haba pynrem ïa ka jingkren jong u Bah Prestone, utei u nongïalam ka VPP u la ong, “Ka party ka la dep ban pynmih ïa ka jingkynthoh kaba tyngeh halor kane. Ngam tharai ba u Symbud Myntri Rangbah u dang don ïa ka hok ban bteng ha ka kam. U dei ban hiar shuki.”
U la bynrap, “Tang ka jingpanmab kam ïahap shuh haba phi pynmih ïa ka jingkren kaba kynthup lang ïa ka kynhun nonghikai, kiba la shim ïa ka bynta kaba khraw ban ai jingnang jingstad ïa ki khun jong ngi bad ïa ngi ruh. Um lah shuh ban bteng ha ka kam. U dei ban hiar shuki.”
Nangta u la ong ruh ba kam ïahap shuh ba kat u Symbud Myntri Rangbah ban kren da ki ktien kiba pynjah burom ïa ki nonghikai khamtam namar ha man la ki jaka, la ñiew ïa ki nonghikai kum ki nongtei ïa ka lawei jong ka Ri.
Hadien kane, u Bah Ardent u la ong ruh, “Ngi khmih lynti ba u Symbud Myntri Rangbah un hiar shuki bad um dei shuh ban bteng ha katei ka kam. Ka long kaba sngewsih shisha ba ki nonghikai ki hap ban mad ïa kum kane ka jingjia.”
Nangta haba kren pat halor ka jingïakhih jong ki nonghikai hapoh ka lama jong ka Khasi Jaintia Deficit School Teachers’ Association (KJDSTA), u Bah Ardent u la ong ba ka sorkar ka pyrshang ban pynkit ïa ka jingbakla jong ka sha kiwei pat. “Ki lah ban kynnoh ïa ngi ruh. To leit ban ïakynduh ïa ka sorkar bad kylli mano ba pynkhih ïa kine ki nongïakhih, bad lehse kin kynnoh ïa ngi.”
Katkum ka jingong jong u, ha ka ri synshar paidbah, uwei pa uwei u don ïa ka hok ban ïakhih bad ban pynpaw ïa la ki jingeh. U ong ruh ba baroh ki don ïa ka hok ban pynpaw ïa la ka jingsngew.

Leave A Reply

Your email address will not be published.