Kular u Myntri Rangbah ban pyndep tei pura ïa ka BB Lyngdoh Memorial Hall, Laitlyngkot

Shillong, Risaw 27: U Myntri Rangbah ka jylla u Conrad K Sangma ha ka sngi baar u la plie ïa ka B.B. Lyngdoh Memorial Hall ha Laitlyngkot bad kumjuh ruh u la plie ïa u dur Mot sahkynmaw jong u (L) BB Lyngdoh, ha ka jingdonlang ki bahaïing hasem, u MLA ka Sohra Bah Gavin Mylliengap, u MLA ka Mawkynrew Bah Banteidor Lyngdoh, u MDC ka Sohra u Bah Titostarwell Chyne, u MDC ka Laitkroh Lyngkyrdem u Bah Shemborlang Rynjah bad kiwei kiwei kiba la shah khot sngewbha.
Ha kane ka prokram kaba lyngkot u Myntri Rangbah haba kren kum u kongsan u la kular ban ïarap synniang pisa napoh ka Chief minister Grant kaba long T. 10 lak ban tei pyndep lut nadong shadong ki jingtrei kiba dangsah jong kane ka Hall.
U la ai jingmut ruh ban pynlong ruh ïa ka Hall kum ka museum kaba rit ban don ki dur, ki jingthoh jong u (L) BB Lyngdoh, nalor ki jingdonkam ban pynmih shuh shuh ki kot lyngba ki jingwad bniah ki riewshem phang ne ki Scholar halor ki kam bad ïa kane lah ban leh lyngba ka Research Scholar Scheme kaba don ka jingmang pisa kaba kyrpang bad ba la don ruh ki scholar, ki jingim bad ki jingïadei halor ki kam saiñ pyrthei bad kiwei.
U Myntri Rangbah u la ong ba un sa shim khia ruh lyngba ka tnat Arts bad ka Sports bad kiwei pat ki lad jingïarap halor ka jingdonkam jong kane ka Hall bad kumjuh ruh kiwei pat ki jingdonkam.
Nangta halor ka dorkhas ba la aiti ha kane ka sngi da ka Elaka Laitlyngkot u Myntri Rangbah u la pynpaw ban kyntiew ïa ka PHC sha ka PHC+ ne ka jaka sumar kaba jan synriem kum ka CHC kaba lah ban don haduh 3 ngut ki doktor, ka jingpynbun ki jaka thiah bad kiwei, bad kiwei pat ba kynthup ïa ka skul secondary school un sa peit na skhim Chief minister kiba u la ong ba un sa pyndep ha ki bynta bynta.
“Baroh ki jingdonkam kiba phi la pynpaw dei ban kynduhlang ïa u MLA ka thaiñ u Bah Gavin Mylliemngap bad nga kyrpad ruh ïa u MLA ban pynbiang lut ïa baroh ki jingdonkam bad ban aiti pat sha nga ban ïoh ban khmih bniah da kano ka lynti yn lah ban ïarap, watla kan ym long ka jingïarap kaba heh, hynrei ngan pyrshang ruh ban ïarap katba nga lah,” bynrap u Myntri Rangbah.
Haba ai jingïaroh ïa ki dkhot ka longïing jong u (L) B B Lyngdoh, u Myntri Rangbah u la ai ka jingïaroh ba ki lah ban synniang lem halor ki jingdonkam kane ka Hall la ka long ha ka pisa bad kiwei. U la ai khublei ïa u MDC ka Sohra u Bah Titosstarwell Chyne, bad u MDC barim u Bah Ryngkatlang, u MLA ba mynta u Bah Gavin bad kiwei kiba la synniang ban pynurlong ïa kane ka sngi kaba sah kynmaw ha ka khanapateng.
“Nga kynmaw ba u (L) P A Sangma bad u (L) B B Lyngdoh ki la long shiparalok bha, ki la mad bun ki jingeh bad ki jingïakhun ha ki jingim, ki la long ki nonghikai ïa ngi ban ïaineh ha ka nongrim bad kumjuh ruh ban ïaishah ïa ki jingeh da kaba phuh samrkhe,” ong u Conrad.
Katba u MLA ka Sohra Bah Gavin Mylliemngap u la ong ba ka long kaba kongsan bha ban kynmaw burom ïa kum kine ki riewkhraw uba la leh bun ki kam bad uba la tip kum u nongïalam ki sorkar khleh khaw lang, ba pynïoh ka MLA skhim bad kiwei.
Na ka liang u MDC ka Sohra Bah Titostarwell Chyne u la ïathuh ba ka jinglut ban tei ïa ka Hall ka long T. 50 lak bad ba la shimpor haduh 10 snem ban urlong, ba kine ki la long lyngba ki MLA skhim bad MDC ha ki por ba sdang ïa ka kam.
“U (L) B B Lyngdoh u la long uwei na ki nongïalam uba la ïaineh ha ki nongrim jong u, naduh ki por ba u la long u Myntri Rangbah ka jylla lah bun tylli ki snem bad watla ha ki por mynshwa ka jingïamih ïarung ki MLA ka la jur bad ka jingkhyllem sorkar ka jur bha ha kito ki snem ba la leit, hynrei u Bah B B Lyngdoh u la ïaineh skhem ha ka nongrim bad kum kane ka jinglong kaba mynta lah duna bha, naba la ïohi ba ka jingphet seng ka la sdang biang bad mynta la bun satang ki nongmihkhmat bym ïaineh ha ka nongrim,” ong u Bah Chyne.
La ïoh jingkren na ka khun u (L) BB Lyngdoh ka Kong Syrpailin Khonglah, ka jingai Dorkhas, ki jingrwai bad kiwei ki prokram.