Ha u bnai Risaw u snem 2027 khmih lynti ban pyndep lut ïa baroh ki jingtei, jingpynheh ha Umroi Airport: Conrad

Shillong, Risaw 27: U Myntri Rangbah ka jylla u Conrad K Sangma ha ka sngi baar u la ong ba la khmih lynti ba ïa ka Shillong Umroi Airport ban pyndep mynta u snem, hynrei na ka daw jong ka jingbun ki kynrum kynram kum ka jingdonkam ban shim jaka na ka bynta ban pynheh ïa kane ka kad liengsuiñ ka la shim por noh ban ïoh sdang ïa ka kam.
Ïa kane u la kren ha ka jingïalang ka prokram plie ïa u Mot Sahkynmaw jong u (L) Bah B B Lyngdoh bad kumjuh ruh ka jingplie ïa ka B B Lyngdoh Memorial Hall hapoh ka shnong Laitlyngkot ha ka sngi Baar.
U Myntri Rangbah u la ïathuh ruh ba mynta la dep ban ïoh ïa ka jaka, ka kam ka la sdang na ka bynta ka jingpynheh ïa kane ka Kad Liengsuiñ kaba don ha Umroi.
“Mynta ngi la sdang ban pynheh ïa ka runway ha kane ka kad liengsuiñ kaba don kumba 550 meter bad ki additional terminal bad kane ka dei ka projek kaba 5 ne haduh 6 klur ka jinglut bad ka jingpyntreikam ïa kane ka la ïaid bad nga dang ap ban ïohsngew ba ka dei ban pyndep bad ngam lah ban ong ban aikyrteng biang da kawei kat bym pat ïohi ba ka jingtei ka la long ha ka dur kaba thymmai naba kin sa don kiwei pat kiba shim saiñ pyrthei ban ong ba la ai kyrteng katba ka jingtei ka dang dei kaba rim,” u la ong.
U la ong ba u pyndonkam da ka ktien khmih lynti naba u ong ba ym tip ia ka ban sawan hadien hynrei u khmih lynti ba la kumno kumno ha u bnai Risaw u snem 2027 la khmih lynti ban lah pyndep noh ka jingpynheh ïa kane ka kad liengsuiñ bad ban ïoh ban ai kyrteng thymmai ïa ka, kumba la pynbna hapoh ka Ïingdorbar Thaw aiñ.
“Nga khmih lynti ba hadien ba la pyndep pura ïa baroh ki jingtei yn lah ban ïoh ka liengsuiñ kaba wan bad leit beit sha Delhi, Kolkata, Bangalore, Hyderabad bad ki liengsuiñ kiba heh kin lah ban wan hiar kiwei kiwei, bad shisien ba la pyndep ïa ka jingtei, la ïoh ki ïing kiba thymmai, ki terminal thymmai bad la lah ban pynheh hangta ngin sa plie bad ai kyrteng thymmai,” u la bynrap.
Ïa kane ka jingai kyrteng ïa ka Shillong Umroi Airport na ka liang u Myntri Rangbah u la ong hadien ba ka khun kaba nyngkong na ki kynthei jong u (L) Bah B B Lyngdoh haba ai jingkren lamphang ha ka prokram ban kynmaw ruh ïa ka lyngkhuh sngi khlad noh u (L) B B Lyngdoh kaba 23 snem, ka kong Syrpailin Khonglah ka la pynkynmaw ïa u Myntri Rangbah ha u la pynpaw hapoh ka Ïingdorbar Thaw aiñ bad kumjuh kaba dei ruh ka sienjam kaba la shim jong ka kynhun myntri kaba rim hapoh ka jinglong Myntri Rangbah u (L) Dr. D D Lapang ban ai kyrteng ïa kane ka kad liengsuiñ ha ka kyrteng u (L) Bah B B Lyngdoh kum ka dak ka jingburom bad ainam ïa ki kam kiba u la leh bad khamtam ban pynïoh ïa ka jylla Meghalaya lyngba ki snem ki jingkhuh Hills State Movement.