50 snem jong ka jingiaid lynti ha ka jingshakri ïa u Blei, rakhe ka RBSCF Nongpoh ïa ka jubili ksiar

Nongpoh, Risaw 24: Ka Ri Bhoi Students Christian Fellowship, Nongpoh mynta ka sngi ka la rakhe ïa ka jingdap 50 snem (Golden Jubilee) jong ka jingïaid lynti jong ka kynhun ha ka jingshakri bad ka jingmane ïa u Blei, da kaba pynlong ïa ki prokram kyrpang ha Ri-Bhoi College, kum ka dak jong ka jingkynmaw bad ka jingsarong ïa ka jingïaid lynti jong ka kynhun ha kine ki san phew snem.
Ha kane ka sngi kyrpang, la pynlong ïa ka jingpynher ïa ka lama jong ka Golden Jubilee da u Rev. M. S. Shadap, ha ka jingdon ryngkat u Bah Charles Marngar, MLA ka Mawhati Constituency, u Samla Khlainbor Lapang, President ka Ri Bhoi Students Christian Fellowship Nongpoh, ka Kong Pawshai Syngkli, Secretary jong ka kynhun, ryngkat bad kiwei pat ki nongïalam bad ki dkhot jong ka fellowship.
Hadien ka jingpynher ïa ka lama, la pynlong ïa ka jingïaseng lyngkot kaba la pynïaid da u Samla Khlainbor Lapang, ha kaba u Bah Charles Marngar, MLA ka Mawhati, u la ai ïa ka jingkren lyngkot.
Ha kane kajuh ka sngi, la pynlait paidbah ruh ïa ka souvenir jong ka Ri Bhoi Students Christian Fellowship Nongpoh, kaba long ka thup sah jingkynmaw ïa ka histori, ka jingtrei bad ka jingiaid lynti jong ka kynhun ha kine ki 50 snem ba la leit noh.
Kane ka jingrakhe ïa ka jubili ksiar ka long ka dak jong ka jingkynmaw ïa ka jingshakri ba la pynlong da ka Ri Bhoi Students Christian Fellowship Nongpoh ha kaba kyntiew ïa ka jingngeit Khristan, ka jingmane bad ka jingshakri ïa u Blei, khamtam hapdeng ki samla pule jong ka Ri Bhoi District.