Pynskhem bad pynbam smai ka HNYF Northern Region ïa ki nongkitkam bathymmai ka Nongpoh Circle

Nongpoh, Risaw 25: Ka Hynñiewtrep National Youth Front (HNYF) Northern Region haka 24 tarik Risaw, ka la pynlong ïa ka jingïalang ban pynskhem bad pynbam smai ïa ki nongkitkam ba thymmai jong ka HNYF Nongpoh Circle, haka jingïalang kaba la long ha Dorbar Hall Sajer, Nongpoh.
Ïa ka jingpynskhem bad pynbam smai ïa ki nongkitkam ba thymmai la shimbynta da u Bah Sadon K. Blah, President Rangbah ka HNYF sengkmie, ha ka jingdon ryngkat u Bah Robinson Umbah, President ka HNYF Northern Region, u Bah Plielad Tiewsoh, Assistant Rangbah Shnong Nongpoh Proper, u Bah Donroi Kshiar, Education Secretary ka HNYF Northern Region, u Samla Shining Kyntla, Finance Secretary ka HNYF Northern Region, ryngkat bad kiwei pat ki nongïalam bad ki dkhot jong ka seng.
Ki nongkitkam ba thymmai jong ka HNYF Nongpoh Circle kiba la shah pynskhem ki kynthup ïa u Bah Stephan Kshiar kum u President, u Bah Fullbok Lyngdoh kum u Vice President, u Bah Birbor Khongbeh kum u General Secretary bad u Bah Biren Rani kum u Assistant Secretary, ryngkat bad kiwei pat ki nongkitkam bad ki dkhot jong ka circle.
Haba ai jingkren ha kane ka jingïalang, u Bah Sadon K. Blah u la pynkynmaw ïa ki nongkitkam bad ki dkhot ba thymmai halor ki nongrim bad ki jingthmu treikam jong ka seng. U la pynpaw ruh ïa ki mat bad ki jingïaleh bapher bapher kiba ka seng ka la ïengskhem bad trei naduh ki por ba mynshwa, da kaba kyntu ïa ki nongkitkam ba thymmai ban bat skhem ïa ki nongrim jong ka seng bad ban trei shitom ha ka jingshakri ïa ka jaitbynriew.