Tuid ki paid riewngeit sha ka Tetelesta bad ka retreat ba 3 sngi ha Nongpoh

Nongpoh, Risaw 25: Ki paidbah riewngeit khristan na kylleng ka jylla Meghalaya ki la tuid sha ka Nongpoh Parish, Ri-Bhoi District, ban shim bynta ha ka Tetelestai Meghalaya Retreat, kaba lai sngi lynter kaba la pynlong naduh ka 23 tarik haduh ka 25 tarik u Risaw, ha kaba la sam ïa ka ktien u Blei da u Br. Sajith Joseph.
Ha kane ka jingïaseng ba kyrpang, la donlang u Archbishop ka Archdiocese Shillong, u Most Rev. Victor Lyngdoh, u Rev. Fr. Peter Syiemlieh, Parish Priest ka Nongpoh Parish, ryngkat bad kiwei ki Lyngdoh, ki Brother, ki Sister, ki nongïalam niam bad ki paid riewngeit kiba la wan na ki bynta bapher bapher jong ka jylla.
Naduh ka sngi sdang jong kane ka retreat, la sakhi ïa ka jingwan tuid jong ki paidbah kiba kwah ban pynjan ïalade sha u Blei, ban sngap ïa ka ktien jong u bad ban shim bynta ha ki jingduwai. Kane ka retreat ka long ka kabu ïa ki riewngeit ban wad ïa ka jingpynim, ka jingkyrmen bad ka jingpynthymmai ïa la ka jingngeit lyngba ka jinghikai jong ka ktien u Blei.
Naduh ka sngi sdang ki paidbah kila tuid shakatei ka jaka ban mad ïaka bor phylla ka jong u Blei lyngba ki kam bah bala leh da u briew jong u Blei ha katei ka jaka naduh ka jingpynkhiah ïaki jingpang ki jingshitom bad wat kiba la don hapdeng ka jingthiah pang la bun snem kiba mad ïaki jait jingpang ba lai phew jait kila ioh ka jingkoit kaba mardor hadien ka jingpynduwai.
Nalor ka jingiohsngew ïa ki jinghikai ba kynja mynsiem, kane ka retreat ka la ai ruh ïa ki riewngeit ka lad ban pynjan shuh shuh ïalade sha u Jisu Khrist, ban pynskhem ïa ka jingngeit bad ban wad ïa ka jingsuk mynsiem lyngba ka jingduwai bad ka jingmane.
Mynta ka sngi u Blei kaba dei ka sngi pynkut ïa kane ka Tetelestai Meghalaya Retreat, ka jingwan tuid jong ki paidbah kala long kaba shyrkhei kaba la wanrah ïa ka jingkhapngiah jong ki surok ha Nongpoh bad ruh ka jingdheng kali kaba jur namar ka jingtuid ki paidbah ban leit ban shim bynta ha katei ka jingïaseng kyrpang.