6 tylli ki kali kit jaboh bad 3 tylli ki kali pynkhuid surok ïoh ka thaiñ Byrnihat

Nongpoh, Risaw 23: Ka thaiñ Byrnihat kaba la ioh nam kum kawei naki jaka ba jaboh tam mynta ka sngi kala ioh pdiang haduh 6 tylli ki kali ban kit ïaki jaboh jabaiñ naki 20 tylli ki shnong kiba la tip kum ki Electric Waste Collection Vehicle bad 3 tylli ki kali pynkhuid surok kiba la tip kum ki Mechanical Road Sweeper naka ophis u Block Development Officer ka Umling C&RD Block naka bynta ban pynkylla dur ïaka thaiñ Byrnihat bad khamtam ban kit bad bret ïaki jaboh jabaiñ naki shnong ki thaw sha ki jaka ba dei ban bret.
Ïa kitei ki 6 tylli ki kali kit jaboh bad ñiut la mang pisa haduh T.57,44,459, katba kitei ki 3 tylli ki kali pynkhuid surok la mang pisa haduh T.77.999 lakh bala bei pisa da ka National Clean Air Programme jong ka Ministry of Environment, Forest and Climate Change haka jingïatreilang ka Meghalaya State Pollution Control Board bad ka ophis u Deputy Commissioner ka Ri Bhoi District.
Ha kane ka juh ka sngi la sam ruh ïaki jaka thep ñiut (Dustbin) sha ki longiing haka thaiñ Byrnihat ryngkat ka jinghikai ba ki paidbah ki dei ban pynïaphiah hapdeng ki ñiut kiba pyut bad ki bym pyut haba buh hakitei ki jaka theh ñiut.
Ïa kitei ki kali kit jaboh bad kitei ki kali pynkhuid surok la pynlait paidbah mynta ka sngi da u Bah Sosthenes Sohtun Myntri sorkar jylla ba dei ruh u MLA ka Jirang kum u kongsan haka jingdonlang u Dr. Abhishek Saini Deputy Commissioner ka Ri-Bhoi, u Raja Brahma Project Director ka DRDA, u Bah Eric Kevin Dkhar BDO ka Umling C&RD Block, ki nongïalam shnong, ki longkmie longkpa, lem bad ki khynnah skul.
Haba kren ha kane ka sngi naka liang u Bah Sosthenes Sohtun u la ong ba ka Byrnihat haki snem bala leit noh kala iohnam kum kawei naki shnong ba jaboh tam, hynrei ka sorkar mynta kala buhthong ban pynkhuid ïaka lyer bad ki jaboh jabaiñ ban pynkylla ïa katei ka thaiñ ban lum ban lang ïaki jaboh jabaiñ haki jaka ba dei lyngba kitei ki kali kiba ban sa kit ïaki bad bret haka jaka bret ñiut.
U la ong ruh ba kum u nongmihkhmat u kwah ba katei ka thaiñ kan don ka jingkylla haba ïadei bad ka khuid ka suba bad kane baroh ka urlong dei lyngba ka jingshimkhia ka ophis u Deputy Commissioner ka Ri-Bhoi, ka MSPCB, ka jingïatreilang jong ki shnong ki thaw ban don ka jingkitkhlieh ban wanrah ïaka khuid ka suba ha katei ka thaiñ.
U la kyntu ruh ïaki paidbah khamtam ki nongïalam shnong ba kin sumar ïa kitei ki kali ym ban pyndonkam bakla namar kila don ki shnong haki por bala dep haba ki ioh ïaki kali naka sorkar ki pyndonkam ha kiwei pat ki kam bad lyngba ka jingïatreilang jong baroh ki shnong khmih lynti ba ka Byrnihat sa shisien kan kylla dur haba ïadei bad ka khuid ka suba.