Haba ïakhun ki eksam ha Khasi bad Jaiñtia dei beit da ka ktien Khasi, sha Garo Hills da ka ktien Garo: KHNAM

Shillong, Risaw 23: Ka Sorkar Jylla lyngba ka Office memorandum na ka Personnel Department ka la pynmih ïa ka kyndon ba donkam ban pass ïa ka test ha ka ktien Khasi na ka bynta ki kam ki ba hap hapoh ka DSC jong ki District ba hap hapoh Jaiñtia Hills bad Khasi Hills District bad na ka liang ka KHNAM ka la pynpaw ba kane ka long pynban kum ka jingpyrshah ïa kiwei pat ki riewlum jaitbynriew kiba don ha ka jylla.
Kumta halor kane lyngba ka kyrwoh na ka liang jong u Working President jong ka KHNAM u Bah Thomas Passah ha ka kyrwoh kaba dangshen u la ong, “Hynrei ngi la ïohi ïa ka jingpyrshah jong ka All Khasi Hills Achik Joint Action Committee (AKHAJAC) bad ki la dawa ruh ban ailad ruh ban thoh da ka ktien Garo.”
“Kumba ka seng HNYM ka la pyrshah ïa kane ka jingdawa jong ka AKHAJAC ngi ruh ngi pynpaw ba kam long kaba dei ban pdiang ïa kane ka jingdawa jong ki. Ka jylla Meghalaya ka don ar tylli ki jaitbynriew bad la phiah ïa ki katkum ki district bad la pruid dak ruh ïa la u jong u jong u pud u sam bad ka long kaba donkam ban burom ïa kata bad ban kiar na ka jingïakyntur pud ïoh ka wan ka jingïamynsaw ha ki por ki ban sa wan,” ong u Bah Thomas Passah.
U la ong ba ka long kaba dei ban pynthikna ba kiba ïohkam ha ki District ha Khasi bad Jaiñtia Hills District kidei ban pass ïa ka text ha ka ktien Khasi namar kan pynsuk ruh ïa ki paidbah kiba leit sha kitei ki office na ka bynta ki kam kiba bun.
“Ngi sngewdei bad sha Garo Hills District ruh dei ban ailad tang ïa kiba pass ïa ka test ha ka ktien Garo. Ngi kyrmen ba ka AKHAJAC kan sngewthuh ïa kane bad ngi kyntu ruh ïa ka Sorkar ba kadei ban bteng beit ban pynlong ïa ki test ha ka ktien Khasi na ka bynta ki kam ha Khasi & Jaiñtia Hills District bad sha Garo Hills District pat da ka Ktien Garo,” bynrap u Working President ka KHNAM Central Body u Bah Thomas Passah.