Lyngba ka SPARK ka lad kabu ksiar ïa ki samla ban kren, kynduh bad sngewthuh ki kolshor bapher bapher: Conrad

Tura, Risaw 23: Ka tnad pule puthi, sorkar Meghalaya ka la dep pynlong ïa ka prokram jong ka SPARK Meghalaya, kaba mut ka School Programmes in Articulation, Resilience and Kindness – State Summit ’26, mynta ha District Auditorium, Tura kaba la plie pyrda da u Myntri Rangbah ka jylla Meghalaya, u Conrad K. Sangma, kum u kongsan.
La donlang ruh ki heh sorkar na ki bor ba dei peit jong ka distrik, ki heh nongtrei jong ka tnad pule puthi, dkhot jong ki nongbishar, principal, nonghikai bad ki samla pule bad ki samla na ki distrik bapher bapher bad ki skul jong ka jylla Meghalaya.
Ha katei ka jingïalang, u Conrad u la ong ba ka long ka jingshem ba sngewtynnad jong u ban don lang bad ki samla pule bad u la kynmaw ïa ka jingïalang jong ka State Summit ha ka nongbah Shillong kaba sngewtynnad bad u la pyntip ïa ka kynhun SPARK ba ïa kane ka jingïalang, yn pynlong ha Tura mynta u snem da kaba ong ba ka daw ka long kaba kongsan na ka bynta ki samla ba kin sam bad shem ïa ka jingriewspah ka jylla ha ka rukom im, ka ktien ka thylliej, ka khyndew ka shyiap, ka jingitynnat, ka bam ka dih bad ka jingshad jingkmen. Ka jingleit bad ka jingshong sah ki long ka bynta jong ka jingkynduh kaba kin kynmaw sah.
U la ong ba u la sngewkmen ban ïohsngew ba bun ki khynnah pule ki la dep leit sha Tura ha ka sien ba nyngkong bad kane ka jingïalang ka ai la lad kabu ksiar ïa ki samla ban ïakren, kynduh bad sngewthuh ïa ki kolshor bapher bapher bad ki jingmut jong ki paidbah.
Haba pynpaw halor ki thong kiba ïadei bad ki samla da ka sorkar, u la kdew ba lyngba ka MGMP, 8,000 ngut ki nongrwai jingsneng mynta ki rwai ki tem ïa kaba ki sngewtynnad, ‘ki kamai bad ki pynlut biang’ da kaba pyni ïa ki sap lah ban pynlong palat 20,000 tylli ki lympung rwai lane tem ha kylleng ka jylla, ka ri bad ka pyrthei ryngkat ka jingkyrshan ka sorkar kaba la pynlong ïa ki nongrwai jingsneng ban pyni ïa ki sap haduh ha Japan bad Germany bad u la pyntip ruh shaphang ka CM Elevate program bad ki jingpynlut tyngka ha ka sector Sports.
Da kaba ai khublei ïa ki tnad pule puthi u la pyntip ba bun ki prokram jong ka jylla Meghalaya la long ha ki bynta ba hapoh ka jylla bad u la ong ba lada pynlut pisa ha kum kine ki prokram kam dei ba shu pynlut kai ïa ka pisa hynrei ka long ka jingïarap ban bei tyngka kaba long ka jingbha ïa ki pateng ban wan.
Ha katei ka jingïalang, la don ka jingpyllait ïa ka SPARK Outcomes Report 2026, ki jingshad tynrai bad kiwei kiwei da ki khynnah pule bad ki nonghikai bad ka jingpynkup burom ïa ki khlur jong ka District SPARK Stars.