Nongpoh, Risaw 27: Katkum ka thup ba khatduh jong ki nongthep vote bala pynmih haka 26 tarik mynta u bnai ka Mawhati konstitwensi ka dei kaba bun tam ki nongthep vote napdeng 5 tylli ki konstitwensi ha Ri-Bhoi District.
Haba phai sha ka jingbun paid haba ïadei bad ka jingdon ki nongthep vote hadien bala pyndep ïaka SIR, ka Mawhati konstitwensi ka wan haka kyrdan ba nyngkong bad don haduh 41,272 ngut ki nongthep vote, bud pat sa ka Umsning kaba don haduh 39,307 ngut, ka Jirang 39,031 ngut, ka Nongpoh 38,852 ngut bad ka Umroi kadei kaba khatduh ka don 32,677 ngut ki nongthep vote.
Kumba ka tnad elekshon ha Ri-Bhoi kala pynmih ïaka thup ba khatduh jong ki nongthep vote, ki paidbah ki lah ruh ban peit bñiah ïala ki kyrteng haki Electoral Roll bala dep pynmih ha ophis u DC lane haki Polling Stations.
