Jowai, Risaw 27: Ki dkhot jong ka Khasi Jaiñtia Youth, Student Union, KJYSU), ki la pynpaw ba ka jingkren u bah W Kharlukhi uba la ong – “I will be very happy if they can really revive coal mining in Jaiñtia Hills” ha ka jingïadei bad kane ka bynta ka Union ka kwah ban kylli bad da kaba ong balei ba um kren mynba u dang don ha ka NPP, namar mynba u bah Kharlukhi u dang long u heh jong ka NPP bad u MP, balei um shym la kren ïa kane ka mat, mynta ba u la mih na ka NPP, u sa kren kum u riew paidbah.
Da kaba ong kane ka jingeh jong u dewïong ha Jaiñtia Hills kala neh la 12 snem. Hynrei ka sorkar ka la ai tang ki jingkular, hynrei ha madan kam shym la lah ban plie.
Lada ka Sorkar kam lah ban plie noh, ka Union ka la ong ba kloi ban pyni ki buit ne ki lynti, lada ka Sorkar Meghalaya kam lah shisha ban pynlait ïa u dewïong, ka dei ban ong shai sha ki paidbah. Ki paidbah ka Jaiñtia Hills kim kwah ban shah khang namar u dewïong u dei u jong ki hi. U dei ka hok longtrai. Ka JHADC ruh kam lah ban pynbeit, ka Sorkar Jylla ruh kam lah. Kumta ka jingeh ka long kaba heh.
Kumta na ka liang ka KJYSU, ka kyntu jur ïa ka Sorkar, lada kam lah ban plie ïa u dewïong, to khot ïa ki kynhun bapher bapher to shim ïa ka jingmut jong ki samla, jong ki trai dewïong bad jong ki dorbar shnong. Na ka liang ka Union ruh, kan ap ïa ka buit ban ïarap ban pynbeit ïa ki kot ki sla bad ban wad ïa ka lad kaba biang. “U dewïong um dei u mar jong ka party – u dei u mar jong ka Jaidbynriew Jong ngi”, ong u samla D. Shullet General Secretary bad u samla C Phawa President KJYSU.
