Khuslai u Myntri Rangbah ba nang kiew ka jingdon ki briew ba don ïa u khñiang HIV/AIDS ha ka jylla
Shillong, Risaw 27: Ka State Level Red Ribbon Youth Festival 2026 bad ka Samman Samaroh Award ba la pynlong da ka Meghalaya AIDS Control Society (MACS) la pynlong mynta ka sngi ha U Soso Tham Auditorium, Shillong ha kaba u Myntri Rangbah ka Jylla, u Conrad K Sangma u la don lang ha kane ka sngi.
Haba kren ha kane ka sngi, u Myntri Rangbah ka Jylla, u Conrad K Sangma, u la ong ba ka jylla Meghalaya mynta ka mad ïa ka jingpang HIV/AIDS kaba jur bha ha kaba ka jingdon ka nang kiew man la u snem bad u la ong, “Ka donkam kyrkieh ïa ngi baroh ban iatreilang bad kam dei tang ka Meghalaya Aids Control Society, ka tnad ka koit ka khiah ka dei ka jingiarap jong ngi bad ka sorkar kan ban pynthikna ba ngi lah ban tehlakam ïa kane shwa ba kan nangeh ha ki sngi ban wan.”
U Myntri Rangbah ka Jylla u la batai ïa ka plan ba kongsan jong ka sorkar jylla ha ka rukom thmu kaba san snem ban ialeh pyrshah ïa ka jingkiew jong ka jingpang HIV/AIDS lyngba ka jingai pisa kaba heh bad ka rukom treikam kaba bun bynta. “Ka sorkar jylla ka la sdang ïa ka mishon kaba san snem da ka mang tyngka ba nyngkong kaba long T. 25 Cr,” u la ong bad pyntip ba kane ka buit treikam ka bud ïa ka UNAIDS 95-95-95 targets framework kaba long ban ithuh ïa kiba ïoh ïa ka jingpang, ban ai dawai ban ïaleh pyrshah ïa u khniang jingpang bad ban pynthikna ban pynduhjait ïa u khniang jingpang.
Halor ka jingsumar u Myntri Rangbah ka Jylla u la ong ba ki dawai pyniap khniang ki don ban pynduhjait ïa u khniang jingpang bad ban ïada na ka jingsaphriang jong u bad ka mission plan ka phaikhmat sha ka jingtest bad ai ïa ki nongpang HIV da ki dawai kiba bteng lyngba ki rukom bad ki lad ki lynti kiba suk.
Halor ki jingthmu ha ka imlang sahlang bad ka jingïadei bad ki samla u Myntri Rangbah u la ong ba ka thong ba kongsan ka long ban pynduna ïa ka jingshah kynnoh lyngba ka khubor ba ka “bha” ban test bad “bha” ban wad jingsumar. “Ka jingpynduna ia ka jingshah niewbein ha kaba iadei bad ka jingpang HIV bad ka jingdih drok ka long kaba donkam bha na ka bynta ban pynshlur ia ki briew ban leit sha kiwei pat,” u la ong bad pyntip ruh ba ka mishon ka wad ban pynkupbor ia ki samla ban shim ia ki rai kiba bniah ha kaba iadei bad ka jingpynbor jong ki paralok bad ka jingshngain shimet.
Haba ïadei bad ki samla kiba la shim ba ki dei ki nongshim bynta ba kongsan tam jong ka jylla u Myntri Rangbah u la pyntip ba ka mission ka thmu ban btin lynti bad kyrshan ïa ki samla bad pynshlur ïa ki samla ban shaniah ha la ka jong ka jingsngew bad ban sngew shngaiñ ban ong em ïa ki jingjia bym shngaiñ.
Ka South Garo Hills ka la ioh ia ka khusnam Surakshit District Award, katba ka Ialong CH ka la ioh ia ka khusnam Best Performing ART Centre namar ka jingtrei kaba dei ban ai jingiaroh ha kaba pynpoi ia ki jingshakri ART sha ki PLHIV bad ka Mihmyntdu Community Social Welfare Association, ka West Jaintia Hills ka la ioh ia ka khusnam kaba Best Performing TI ha kane ka sngi.