Ha ka 4 tarik u Naiwieng yn plie ïa u mawnongrim ban maramot ïa ka surok RBBJ ha khappud

Khliehriat Risaw 30: Ka jingkhmih lynti ki paidbah jong ka thaiñ khappud ban ïoh ïa ka surok kaba bha, kan sa urlong noh shen, ha kaba u myntri ka sorkar jylla uba dei ruh u MLA jong ka Khliehriat Constituency, u bah Kyrmen Shylla, un sa wan ban plie ïa u maw nongrim ha shnong Bataw ha ka 4 tarik u naiwieng 2022 na ka bynta ban shna ïa kane ka surok ha khappud.
Katkum ka kaiphot ba la pyllait da ka Ministry of Road Transport jong ka sorkar India (Zone North East) la pynpaw ba ïa ka mang tyngka kaba T24.160 klur tyngka la dep pynllait lyngba ka Central Road Infrastructure Fund (CRIF) kaba la mang na ka bynta ban maramot ïa katei ka surok ha ki thaiñ khappud kaba don hapoh East Jaiñtia Hills District kaba haduh 30 kilo mitar.
U myntri ka sorkar jylla, uba dei ruh u MLA ka thaiñ, u bah Kyrmen Shylla, u la ïathuh ba hapoh kine ki saw snem tam, ki paidbah jong kane ka thaiñ ki la ju pynpaw ki jingeh namar ka jingsniew palat ka surok bad ki la kyntu ïa u kum u nongmihkhmat ba un ïarap lem ban wad ki lad ki lynti ban ïoh ban maramot bha ïa kane ka surok “Ha ka jingïaid lynti ki ju don ki por ba duh mynsiem, tangba nga ngeit ba ngan ïoh ka lad ban ïarap bad nga ju ong ruh ïa ki paidbah ba kin long kiba ïai shah bad mynta sngewtynnad ban pynbna ba ha ka 4 tarik jong u bnai naiwieng 2022 ngin plie noh ïa u maw nongrim jong kane ka surok bad la khmih lynti ruh ba ynda la dep maramot bad shna bha ïa ka surok kan ïarap bad pynsuk shibun ïa ki paidbah ha ka leit ka wan bad kumjuh ruh kan pynsuk ïa ki paidbah nongrep ha ka kit ka bah ban pyn poi ïa ki mar rep sha ki jaka ïew.