Ban pynshlur ïa ki samla, pynkup burom ka RMF&CA ïa ki samla pule ba pass bha ka Raid Mathan

0

Nongpoh Risaw 30: Ban ai mynsiem bad ban pynshlur ïa ki khun samla ka thaiñ ba hap hapoh ka Raid Mathan ba kin dang don ka mynsiem ban kiew sha ki kyrdan ba shaneng ha ka pule ka puthi, ka Raid Mathan Youth Forum & Cultural Association ha ka sngi Saitjaiñ ka la shim ïa ka sien jam ban pynkup burom na ka bynta ki samla kiba la pas bha ha ka SSLC bad HSSLC bad kynthup ruh kito kiba la pyndep ïa ka Graduation jong u snem 2022.
Ïa kane ka jingpynkup burom ïa ki samla pule la pynlong ha Ïing Dorbar ka Shnong Umshaken ha kaba ka Raid Mathan Youth Forum & Cultural Association ka la sam ruh da ka khusnam pisa ryngkat ki syrnot kum ka jingai burom ïa kitei ki samla kiba la pas ha ki kyrdan bapher bapher.
Ïa kane ka jingpynkup burom la wan ban shim bynta ruh da u President ka KSU, North Khasi Hills District Unit, u Samla Ferdynald Kharkamni kum u kongsan bad la sakhi lang ruh da ka jingdon lang u President ka FKJGP North Khasi Hills District Unit, u Bah Lui Star Lyngdoh, u President ka HNYF, Northern Region, u Bah Marcus Marten, u President ka Raid Mathan Forum & Cultural Association, u Bah Pius Ronghang bad kynthup naduh ki nongïalam shnong, ki riew rangbah bad ki kmie ki kpa jong ki khynnah skul ryngkat ki nonghikai bad ki khynnah skul.
Ïa kitei ki khusnam ryngkat ki syrnot ai mynseim ïa kitei ki samla la sam da kitei ki nongïalam seng na Ri Bhoi bad kynthup ruh ki riew rangbah bad ki nonghikai jong ki skul.
Haba kren ha kane ka jingïalang pynkup burom kum u kongsan, Samla Ferdynald Kharkamni, President ka KSU North Khasi Hills district Unit, u la ong ba kum u nongïalam seng na Ri Bhoi u pynpaw ka jingkmen ban ïa don ryngkat ha kane ka sngi ban ai buro ïa kine ki samla kiba la pas ha ki kyrdan bapher bapher bad kane ka jingpas bha jong ki ka long ka jingai mynsiem ïa kiwei ki khun samla ba kin dang lah ban leh bha bad khamtam ka jingsam ïa kine ki khusnam ka long kum ka jingai mynsiem ba ki samla pule kin trei shitom ha ki jingpule ba kin poi sha ki kyrdan kiba shalor ba kin long briew man briew hadien habud.
Ha kawei ka bynta u la ai ka jingïaroh ruh ïa ki samla ka Raid Mathan namar ka jingiohi jngai ki la lah ba pynkupburom ïa kine ki samla, ha kaba kum ki samla ruh ki dei ban sngewsarong ba don kiba iohi ïa ki jingtrei shitom jongki ha ka jingpule bad kaba kham donkam tam ha ka jingim jongki ba ki dei ban don ïa ka thong ha ka jingim jongki ba kin leh bha ïa ki jingpule, namar dei tang kito kiba don ka thong bad kiba trei minot kin sa ioh kheit ïa u soh bathiang jong ka jingtrei shitom jong ki na kabynta ka lawei ba phyrnai jongki, u la bynrap.
Ka long ruh ka jingai mynsiem ïaka RMFCA ha kaba naka liang ka seng KSU, FKJGP bad HNYF ha katei ka sngi kila aiti ruh da ka pisa T30 hajar kum ka jingkyrshan ïa katei ka kynhun ba kan dang lah ban trei shuh shuh ki kam ki ban kyntiew ïaki khun samla.

Leave A Reply

Your email address will not be published.