Mih shakhmat 18 ngut ki nongtrei DC ba noh syniang sha ka project ‘Mynried’ ban ïarap ïa ki khynnah

Khliehriat Risaw 27: Ka project ‘Mynried’ ka dei ka project ba la saiñdur da ka ophis u Deputy Commissioner ka East Jaiñtia Hills District naduh ki khyndiat snem ba la leit bad kane ka project ka dei halor ka jingthmu ban kyntiew ïa ki khynnah kiba naduh 1 snem kyrta haduh 15 snem kyrta kiba shong ba sah hapoh ka district, kiba na ki longïng kiba dunna ka ioh ka kot bad hynnin ka sngi ha ka prokram Collection Drive ba la pynlong ha DC office ki la don 18 ngut ki nongtrei kiba trei ha ophis DC Khliehriat ki la mih shakhmat bad nohsyniang sha kane ka project da ki tiar bapher bapher.
Kiba pynïaid ïa kane ka prokram ha ophis u Deputy Commissioner ha Khliehriat ki la ong ba kane ka jinglum, jinglang lane ka Collection Drive ka dei kawei ka synjam kaba la ai mynsiem ha kaba la ioh lum haduh 300 jait ki jingnoh syniang ba kynthup ki jaiñ phong, ki tiar ialehkai ki khynnah, ki kot pule, ki juti bad kiwei kiwei ki jait tiar na ka bynta ki khynnah rit kiba dei ki hep rit kiba naduh 1 snem haduh 15 snem kyrta bad ïa kine ki tiar yn sa sam sha ki khynnah bad kane kan long ka lad ban pynsngewbha ïa ki hep rit.
Shuh shuh, ka kynhun ba pynïaid ïa kane ka project Mynried kan sa peit bad bishar bad sam ïa ki tiar sha ki khynnah kiba sah ha ki shnong kiba la pynrung hapoh kane ka project.
La bynrap shuh shuh ba, kane ka Project Mynried kan pynshlur ïa ki nongtrei sorkar ban noh syniang da ki jaiñ phong jong ki khun ki bym pyndonkam shuh, ki kot skul kiba ym pyndonkam shuh ki khun bad kiwei kiwei ki jait tiar, ka kynhun kan sa sam ruh ïa ki jaiñ syiad sha ki khynnah bad ka kynhun kan iarap ruh ban kyntiew ïa ki khynnah ha ka pule puthi lyngba ki tiar ban pule, ka District Management Unit kan shim ruh ka jingiatreilang bad ki heh sorkar lane ki Heads of Departments ban pynshlur ïa ki nongtrei sorkar ban mih shakhmat ban noh syniang lyngba ki tnat ne ophis ba ki trei, ka kynhun kan iatreilang ruh bad ka Supply Branch ban ithuh ïa ki Fair Price Shops ha ki shnong ba don hapoh ka district kum shibynta na ka project ban lum ia ki jingnoh syniang lane project’s collection network, ka kynhun kan peit bniah ruh ïa ka jinglum bad jingsam ïa ki tiar bad kito kiba noh syniang ruh yn ai burom ïa ki da ki syrnot lane Certificate of Appreciation bad ka jingpyntrei ïa kane ka project ka hap hapoh ka jingpeit, jingkhmih u Deputy Commissioner, East Jaiñtia Hills District, u Manish Kumar, IAS lem bad ki heh sorkar ba la jied kiba shim ïa ka jingkitkhlieh ban pyntyllum ïa kane ka project.
Lyngba kane ka Project Mynried,ki bor district kin pyrshang ban wad ïa ki briew kiba don ka mynsiem ban iarap, kiba sbun, kiba don ka mynsiem ban iatreilang ha ka imlang ka sahlang kiba kloi ban kner la ki kti ban noh syniang sha ki longïing kiba hapoh East Jaiñtia Hills District, kiba duna ka ïoh ka kot.
Ha kane ka prokram Collection Drive ba la pynlong hynnin ka sngi, la ïa don ryngkat lang u Deputy Commissioner, East Jaiñtia Hills District, u Manish Kumar, IAS, u Senior Assistant Commissioner uba dei ruh u ‘Project Head jong ka project Mynried, u bah F. Passah, MCS, ka Assistant Commissioner (Additional Project Head) ka E. A. Sangma, MCS, ka Assistant Commissioner Dr. N. Dkhar, MCS; ka Programme Manager jong ka Mih-Myntdu Community Social Welfare Association (MCSWA), ka kong Renibeth Patlong lem bad ki nongtrei kiba trei ha ophis u Deputy Commissioner Khliehriat.