Plie u Symbud Myntri Rangbah ïa ka “Jaiñtia Artist Association” bad pynïoh jingïarap 10 lak tyngka

Jowai, Risaw 25: U Symbud Myntri Rangbah ka sorkar jylla u ma Sniawbhalang Dhar ha kane ka sngi Saitjaiñ ula wan ban plie ïa u mawnongrim kawei na ki kynhun bala seng thymmai jong ki nongrwai bad nongtem napoh ka Ri-Lum Jaiñtia kaba la tip kum ka “Jaiñtia Artist Association” bad kaba don lai tylli ki thong kata ban “Kynkiew, Kyrshan bad Ïada.
Ïaka jingïalang plie paidbah la pynlong ha madan Tpep Pale, Jowai bala pynïaid da u Pynchemiki Lakiang, nalor ka jingdonlang ka kong Emelya Ch. Momin, (MCS) Assistant Commissioner West Jaiñtia Hills District, Jowai, ki nongkitkam ka Jaiñtia Artist Association bad kiwei de kiba la shah khot sngewbha, la ïoh ruh ban pynsngew shaphang ka jingïaid lynti jong ka jingsdang ïa kane ka kynhun JAA da u President samla Redeemson S. Pakma.
Naka liang u ma Sniawbhalang Dhar haba ai jingkren ula ai ka jingïaroh ïa kane ka kynhun kaba la seng napoh ka Ri-Lum Jaiñtia, ula pynsngew hadien ka jingwan mih jong ki sha u katno kala pynkmen ïa u ban ïohsngew ïa kane ka khubor.
Ula ai nuksa ba ka kam rwai bad tem ka long kawei na ki lad ban ïoh kamai, da kaba kdew ka don kawei na ki samla ka Daiaphi Lamare (Rebel) napoh ka jylla kaba la paw bha mynta haka kam rwai shabar ka jylla, kumjuh ïa ka kynhun Khmih Creative Society nalor kiwei de ki nongrwai napoh ka jylla.
Ula pynsngew ruh ba ka sorkar ka ai jingkyrshan pura ïa ki kynhun kia kwah ban seng kam kum haka jingrwai, jingtem bad kaba donkam ïa ki dei ban don ka jingtrei shitom ban kiew shakhmat.
Shi bynta na ka jingkyrshan ïa kane ka kynhun JAA u Symbud Myntri ula pynïoh jingïarap pisa haduh 10 lak tyngka kum ka jingsdang, da kaba kitbok ba kan dang kiew shaphrang haka jingïaid lynti bad ai mynsiem leh ïa kiwei de ki samla ka Ri-Lum Jaiñtia bad don ka thong haka jingim.
Ula kyntu kino kino ki skim kiba ki lah ban ïoh jingïarap na ka sorkar ki lah ban wan ïakynduh bad u ha kine ki sngi ban wan bad u kyntu ïa ka JAA ban don ka jingïatylli haka jingtreikam namar kane ka long tang ka jingsdang jong ki.
Ula don jingmut ruh ban pynlong ïa kawei naka jingïakop hapoh ka jingpynlut pynsep jong u hashaw ka Christmas kaba ïadei bad ki nongrwai napoh ka Ri-Lum Jaiñtia, khnang bak i samla kin ïoh ban pynpaw pyrthei ïaka sap ka phong. Shuh shuh ula kyntu nangne shakhmat na ka liang ki bor pynïaid District jong ka Jaiñtia Hills ki dei ban wanrah ïa ki nongrwai napoh ka District hi ha kino kino ki prokram sorkar.
Hadien kane ka prokram naka liang ki jingrwai bad ki jingtem napoh ka District kila shim bynta ban pynpaw pyrthei ïa ki sap ki phong jong ki halor ka rynsan.