Rung u Aurihonta Das, Star Public School-EJHD ha ka thup Top Child Scientist

Khliehriat Risaw 19: U Aurihonta Das, uba dang pule mynta ïa ka klas XII ha Star Public School Campus, Lumshnong, East Jaiñtia Hills, u dei uwei na ki 60 ngut ki khynnah skul na ri India uba la shah jied ban leit sha Japan ban mihkhmat ïa ka ri India ha ka Sakura Science High School Program kaba yn pynlong ha Japan, ïa kane ka prokram kaba yn sa pynlong ha Japan la iatreilang bad ka Japan Science and Technology Agency (JST).
Ha ka jingleit jong u Aurihonta Das un sa ioh ruh ïa ka lad ban leit jngoh ïa ki skul bah (University) kiba don ha ri Japan bad un ioh ruh ban jngoh ïa ki Advanced Research Laboratories ha ri Japan.
Kum ban shu bynrap, u Aurihonta Das u dei uwei na ki 60 ngut ki National Top Child Scientist ka ri India, u dei u khun jong u Apu Chandra Das bad ka Rupa Das, uba pule ha Star Public School, Lumshnong, ka skul ba la seng da ka company Star Cement Ltd Lumshnong.
Na ka liang u Principal jong ka Star Public School Lumshnong, u la pynpaw ka jingsngewkmen ïa kane ka jingshah jied u Aurihonta Das bad ong ba kane ka dei shibynta jong ka jingpule Science kaba wad jingtip da lade hi kaba ki ong ka Inovative and Creative Science, u la iathuh ruh ba dang shen u Aurihonta Das, u la iashimbynta ha ka 12th National Level Exhibition bad Project Competition, Inspire-Manak ba la pynlong da ka National Inovation Foundation India bad kyrshan lang da ka Ministry of Science and Techology ha nongbah Delhi bad na kane ka rynsan u la shah jied bad rung ha ka thup jong ki 60 ngut khynnah skul ka ri India ban leit sha Japan, la ong ruh ba ka jingthmu jong kane ka khusnam Inspire-Manak ka long ruh ban ai mynsiem bad pynshlur ïa ki khynnah skul ba kin saiñdur bad shna ïa kino kino ki buit thymmai bad pyntreikam ïa ki ha kaban pynneh pynsah ïa ka mariang bad ha kata ka rukom ba ka roi ka par bad kaba pynneh pynsah ïa ka mariang kan ïa iaid ryngkat-ryngkat “Nga khmihlynti ba kane kan ai mynsiem bad pynshlur ïa baroh ki khynnah skul jong ka jylla Meghalaya ba ha ki snem ki ban wan kin ioh ïa ka lad ban leit iashimbynta ha ki rynsan bapher bapher naduh District level, state level, national level ter ter” ong u Dilip Kumar.
Kumjuh ruh na ka liang u Principal jong ka Topcem Public School, Chiehruphi East Jaiñtia Hills District, u Sumant Kumar bad ruh na ka liang u Deputy Commissioner ka East Jaiñtia Hills District, u Manish Kumar, IAS, ki la pynpaw ka jingsngew kmen halor kane ka jingshah jied u samla Aurihonta Das, ki la ai ruh ïa ki kyntien kitbok kitrwiang ïa u ba un nang kiew shaphrang ha ki jingpule.
U Sumant Kumar, u la ong “Nga sngew kmen shibun ba nga iakynduh ïa u samla Aurihonta Das, uba pule ha Star Public School, u dei u khynnah uba don ka sap ka phong, nga ai khublei ruh ïa u Principal ka Star Public School bad ïa ka skul baroh kawei, dei namar ka jingtreishitom kaba la rah ïa ka nam ka burom jong ka skul, nga ai mynsiem ïa kiwei kiwei ki khynnah skul jong ka jylla Meghalaya ruh ba kin shim ïa ki synjam ha kane ka Inovation Creative ban pynpaw ïa ki sap ki phong ban rung sha ka jingwad bniah kaba thymmai da kaba pyntreikam ïa ki buit thymmai kaba lah ban rah ïa ki sha kawei pat ka kyrdan bad ka burom,
Na ka liang u Aurihonta Das, u la ai khublei ïa u Principal ka Star Public School ba u la ai ïa ka lad ka lynti ban leit sha ki rynsan bapher bapher bad uba ju kyrshan ïa u ha ki jingwad jingtip jong u bad ong ruh ba dei u Principal uba sngewthuh ïa ka sap ka phong kaba u don, u la ai khublei ruh khamtam ïa u Abhisek Banerjee, uba dei u nonghikai jong u, uba long u nong ai buit, ai mynsiem lane mentor ha ka jingiaid lynti jong u kum u khynnah skul ha ka jingpynkhreh ïa ka project kaba tip kum ka “Best from Waste Like Tetra Pack” , la ong shuh shuh ba ïa u nonghikai, u Abhisek Banerjee la ithuh ïa u ruh da ka sorkar India bad u la ioh ïa ka syrnot na ka sorkar India.
Kane ka project jong u Aurihonta Das, “Best from Waste Like Tetra Pack” ka dei kata ka project jingstad Science kaba u la lap kaba lah ban ïada ïa ka mariang bad ka iarap ruh ha kaba kyntiew ïa ka ioh ka kot, ka khaii ka pateng bad ong ba kane ka jingleit jong u sha Japan ka long ban pyni shynna bad ruh ban pynbha shuh shuh ïa ka project ban kyntiew ïa ka project namar kane ka project ka dei kaba lah ban ïada ïa ka mariang bad ïa ka jingim ki briew, ki mrad bad kaba lait na ki jakhlia kiba pynjakhlia ïa ka mariang, ha kajuh ka por u kyntu bad ai mynsiem ïa kiwei kiwei ki khynnah ba kin pyndonkam ïa ki sap ba ki don da kaba kin wad bniah da ka jingstad jong ki hi ban pyntreikam ha kata ka rukom ïa ki buit thymmai ba ki shem da lade hi bad kita ki buit thymmai kiba lah ban pynneh pynsah ïa ka mariang sawdong.