Hapoh lai bnai kular u Myntri Rangbah ban wanrah ïa ka Dialysis Unit ha Nongstoiñ

Nongstoiñ, Risaw 19: Ka West Khasi Hills Senior Citizen Association Nongstoiñ (WKHSCAN), kawei na ki Synjuk jong ki riew rangbah ka thaiñ Nongstoiñ, ka la buh ïa ki hynriew tylli ki mat jingdawa ba kongsan eh hakhmat u Myntri Rangbah ka Jylla u Conrad Sangma, na ka bynta ba un shimkhia lem ha kaba ïa dei bad ki jingdonkam kiba ka thaiñ Nongstoiñ baroh kawei ka la donkam kyrkieh ha kine ki sngi.
Napdeng ki mat jingdawa ba ki nongïalam ki la ïoh ban ïakren markhmat bad u myntri rangbah ha ka sngi 16 tarik mynta u bnai ba u hiar sha Nongstoiñ, u myntri rangbah u la kular shai hakhmat ki nongïalam ban pynïoh noh ïa ka Dialysis Unit hapoh ki lai bnai.
Na ka liang u Dr P.Lyngkhoi u ba long u Shongknor ka seng West Khasi Hills Senior Citizens Association Nongstoiñ, haba pyntip sha ki lad pathai khubor, u la ong ba ka Synjuk ka la ïoh lad ban ïakynduh ïa u Myntri rangbah ha MCH Hospital Nongstoiñ. Ka synjuk ka sngewnguh ba u la shah skhor ïa ki jingkyrpad ka seng ïa ki jingdonkam kiba kham ha khmat eh kiba long ki jingeh ïa ka District bad ïa ki District ba marjar.
Kawei na ki mat kiba ka synjuk ka la ïoh ban ïathir markhmat bad u myntri rangbah ki long ka jingdonkam kyrkieh ïa ka Dialysis Unit hapoh Nongstoiñ, namar ka jingdon ki nongpang khyllai (Renal Failure) ki la nangkiew haduh kine ki sngi, ki hap leit sha Shillong la ha ki Private lane Government Hospital.
Bun kiba la hap ban leit ar sien lane lai sien shitaiew bad pynlut tang ka bai kali kumba shiphew hajar haduh khatar hajar shitaiew. Lada ym don Smart Card ki hap pynlut kumba lai hajar bad saw hajar shisien leh Dialysis bad leh ruh haduh ar sien lane lai sien shitaiew. Ka jinglut shitaiew kan poi sha ki arphew ar hajar ei ei.
Nalor nangta ki la dei ban pynlut ïa ki pisa ba don, ne pan ram, ne die ïa ki jingdon jingem lane shu shah haduh ban da ïap. Na ka liang u MR u la shah shkor kyndiang bad u la ong ha u Commissioner ba dei ban pynïoh ïa ka Dïalysis hapoh lai bnai.
Kawei pat ka phang ka dei ïa ka bynta kaba ar jong ka surok Nongstoiñ-Rambrai Kyrshai, ha kaba ka jingjngai na Nongstoiñ sha Kyrshai ka long kumba 60 kilometer bad 35 kilometer bad kaba sah 25 kilometer ym pat ïoh sanction. Ka jingpyntrei lada ïoh sanction kan ai ka jingmyntoi kaba khraw eh ha ka leit ka wan, ka por, ka kit ka bah, ka dor ka mur bad ki nongjngoh kai pyrthei sha ka thaiñ, khamtam kiba leit phah sumar ha Guwahati.
Lada ïoh sanction bad trei noh kan shim por ban poi sha Guwahati tang kumba 2 kynta. Kumba long mynta na Nongstoiñ sha Guwahati lyngba ka Riangdo ka shim por kumba 5 kynta bad na Nongstoiñ-Shillong Guwahati kan shimpor 7 kynta.Kumta ka long ka jingduhnong mynta bad katno yn ïohnong lada ïoh ïa kane ka surok.
Kawei pat ka dei ka surok Nongpyndeng Bye Pass, namar ka Nongpyndeng kumba ka long mynta ka dei ka Educational Hub bad ka jingbym don kane ka Bye Pass ka pynshitom ïa ki khynnah pule, ki paitbah bad ka surok mynta ka la sniew bad rit na Nongpyndeng-Thahnar sha Mawïaban. Ka PWD Nongstoiñ ka la pan estimate kumba Rs 25 Klur hynrei ym pat ïoh haduh mynta.
Ha kaba ïa dei bad ki jaka ieng kali hapoh sor, na ka liang ka synjuk ka la ban jur namar kumba long mynta ki surok kali kineh kajuh ki kali pat ki nang bun bad wanrah ïa ka jingkhapngiah kaba jur man ka por hapoh sor Nongstoiñ.
Ka synjuk ka la pashat jingmut bad ki don ki jaka sorkar kum ki rud surok ranab PHE lada pynmadan kan ngiam da ki spah kali. Ka jaka ha Thanat lah ban shna Multi Storey Parking bad pynkynriah noh ïa ka thanad ha ki jaka sorkar ba hajan, ka ngiam da ki spah kali.
Ka Surok sha Dewlynnong Nongkhnum kaba watla ka long ka jaka ba pawnam ha ka liang ka Tourism, hynrei kawei na ki daw ka long ka jingrit ka surok, ka jingpra bad khohroh khohram. Ka synjuk ka la pashat jingmut ha u MR ban pynheh, pynbha pynskhem bad pynitynnad. Kane kan wanrah burom, ka ïoh ka kot ka kam ka jam ïa ka thaiñ Nongstoiñ.
Kawei pat ka long halor ki jaka ai jinghikai kum ka DIET ba ha kiwei ki District ban mih na West Khasi DIET Nongstoiñ ka la slem bad dei ban ïoh bynta da ki 3 tylli ki D 2/3 kumba 15-17 seat kawei ka District. Ki don kumba 2500 ki Application DIET man ka snem na ka bynta ki 50 seat. Katno ka jingduh jingkyrmen ki nong apply. Ban kham myntoi ka por ka dei ban seng noh ïa ki DIET ha kiwei ki Districts.
Ka synjuk ka ai ruh ka jingkyrkhu kyrdoh kitbok kit rwiang bad duwai na ka bynta u Myntri Rangbah Conrad K.Sangma bad na ka bynta u Bah Gabriel Wahlang local MLA ba un buddien lem ïa kine ki kam.