Dawa ka Meghalaya Unified Teachers Association ban pynhap ïa ki nonghikai SSA hapoh ka SPF

Shillong, Risaw, 25: Ka seng nonghikai kaba la tip kyrteng kum ka Meghalaya Unified Teachers’ Association ka la pynlong ïa ka jingïalang paidbah ha madan student ha Jaïaw ban ïakren bad ban pynskhem ïa ki nongkitkam kane ka seng ki nonghikai kaba don ha kane ka jylla.
Ha kaba ïadei bad kane haba kren ha kane ka jingïalang paidbah u President ka seng, u Babu Aristotle Rymbai u la ong ba ha kine ki por ba la dep ki nonghikai ki don ha la ka jong ka jong ka seng bad haba ki leit ban ïakren bad ka sorkar ki ïakren beit tang na ka bynta jong ki hynrei mynta kila wan ha kawei ka kynhun bad haba ki kren, ki kren na ka bynta jong baroh.
Ha kane ka sngi u President u la ong ba kane ka skhim Sarvashiksha Abhiyan sa katto katne bnai kan sa kut noh kumta, kim lah ban tip kaei ka ban jia dei na kane ka daw ba ki dawa ba ïa ki nonghikai SSA dei ban pynrung ha kane ka “Structure Pay Framework”, kane ka dei kaba la pdiang da ka cabinet.
Dei hadien ba mih kane ka rukom siew kaba thymmai ïa ka tulop ki nonghikai ba ki kynhun seng bapher bapher jong ki nonghikai kum ki nongïalam ki la ïakynduh la bun sien bad dei ha u Naitung mynta u snem, ki sa seng ïa kane ka seng ki nonghikai, ka MUTA.
Kum ka seng ka la dep ban phah ïa ka jingthoh sha u Myntri Rangbah ka jylla, u Conrad K. Sangma ha kaba kila dawa ba ïa ki nonghikai kiba la pynhap ha ka SPF dei ban pynrung ha ka 6th State Pay Commission, ka rukom shah ban shim shuti haba ïoh khun dei ban long kajuh ïa baroh, ka jingsiew haba pang ba shitom na ka bynta ki nonghikai.
Ha ka jingthoh ba kila phah sha u Myntri Rangbah ba ka sorkar ka dei ban plie ïa ka lad ba kin ïoh ïa ka ram kum ka ram shna ïing, thied kali, ka ram ban phah pule skul khun bad ïa ki nonghikai ba la rangbah ka sorkar ka dei ban ai ka jingïarap pisa kaba shisien, ka jingsiew ïa ki nonghikai SSA bad RMSA ka dei ban pyllait ïa ka tulop shisien siew kaba dei jong u bnai ba ki dei ban ïoh naba ka long kaba ki la donkam bha.