Shillong, Nailar, 18: Ka Elite Task Security and Service Agency Training Centre kaba don ha Mawjrong ha ka sngi Balang ka 16 tarik Nailar 2023 ka la pynkut noh ïa ka jingai jinghikai Kaba 45 sngi, ha kaba ïadei bad ka kam security guard, da ka passing out parade ha kaba mynta ka kynti kaba dei ka sien kaba lai ki don haduh 71 ngut kiba la ïoh jinghikai pyntbit na kane ka training centre.
Ïa kane ka jingai jinghikai kaba 45 sngi jong ka 3rd batch ne ka sien kaba lai, la wan ban sakhi lang ka Kong Amilia Swer vice chairman jong ka Indian Red Cross Society Meghalaya State Branch kum ka kongsan, u Bah Andrew Sawian General Secretary ka Indian Red Cross Society Meghalaya State Branch kum u symbud kongsan.
La ïadonlang ruh u Bah John Lyngdoh uba dei u adviser jong katei ka agency, ka Kong R Suting kaba dei ka director jong ka agency, ki kmie ki kpa, kiba haïing hasem bad kiba la shah khot sngewbha.
Kine ki samla kiba la shah hikai ha kane ka agency ki la ïoh jingmyntoi shibun ha kaba ki la ïoh ym tang ïa ka syrnot jong ka security hynrei lyngba ka jing trei shitom jong ki nongpynïaid jong kane ka agency, kine ki samla ki la ïoh ruh ïa ka syrnot na ka civil defence and home guard, bad ka syrnot na ka red cross ha kaba ki la wan ban ai jinghikai halor ka first aid bad disaster management.
Shuh shuh ki la ïoh ruh ïa ka jinghikai halor ka duty and responsibility. Ki la ïoh ruh ïa ka jinghikai ha kaba ïadei bad ka leadership management, personality development ban nang kren ktien nongwei khamtam ka ktien phareng bad nalor kiwei kiwei.
Ka Kong Amilia Swer haba ai jingkren ka la kyntu ïa baroh ki samla kiba la pyndep ïa kane ka training ba kin trei shitom shuh shuh khamtam ha kine ki sngi kyrduh kam kyrduh jam khnang ba kin ïoh ïa la ki kam ki jam. Ka la ai khublei ruh ïa kane ka agency kaba la la ai ka jingshakri na ka bynta ban ai jinghikai ïa ki samla, bad ka la ong ruh ba na ka liang ka Indian Red Cross kan nang ïai don ryngkat ban kyrshan ïa ka agency ha kino kino ki bynta kiba ka donkam.
Ha kane ka sngi la sam ruh ïa ki khusnam shimet lyngba ki trophy bad ki syrnot sha ki hynñiew ngut ki samla kiba la leh bha ha kine ki 45 sngi. Ki khusnam ki kynthup ïa ka best in education ba la ïoh da u Banshngaiñlang Rimiat, 4 ngut kiba ïoh ka nam Best in drill, Welovelightness Wanniang, u Sunshine Lyngkhoi, u Willybrought Diengdoh bad u korbanlang Mawlong, ïa ka nam best discipline la ïoh da ka Loreen Kharpran katba ka ka nam All rounder la ïoh da u Edilbert Thabah.
