Jowai, Nailar, 18: Ka Jaiñtia Coordination Committee for Reservation Policy (JCCRP), mynta ka sngi 18 tarik ha ka jingai khubor sha ki lad pathai khubor lyngba u Chairman u samla Jeshom Shylla uba long ruh u President JSU ha ka jingïadonlang u Secretary ma Sambormi Lyngdoh uba long ruh u President ka JNC, samla O. M. Tariang uba long u President ka JYF, ki la khot bad wer ïa baroh ki nongshong shnong sha ka jingïalang bah haka jingïadei bad ka Reservation Policy ka ban long ha sor Jowai ha 9 tarik u Nailur jong une u bnai ban wan.
Na ka liang u Chairman ka JCCRP, u la ong ba hadien ki jingiakhih bajai bajai kiba la pynlong ha ki jaka bapher bapher jong ka Ri-Lum Khasi Jaiñtia, ha kaba na ka liang ka sorkar ka la kular ruh ban thaw ïa ka Expert Committee ha ka jingïadei ban pynbeit ne pynkylla ïa ka Reservation Policy kaba long kaba la rim palat, ha kaba ka Committee ka la shim biang ïa ka rai ban khot ïa ka dorbar bah ha nongbah Jowai, ha kaba ka JCCRP ka la khot lang naduh ki paidbah ka Ri-Lum Jaiñtia, ki riew shem phang, ki nonghikai skul bad College bad kiwei na ka bynta ban ïa ai jingmut lang ha kane ka Dorbar.
Na ka liang u Secretary ka JCCRP ula kyntu bad ban jur ïa ki paidbah ban wan sha kane ka dorbar kaba donkam na ka bynta ka jaitbynriew, ha kaba ka sorkar ka la pdiang ban pynthymmai ne shna ïa kane ka Reservation Policy kaba noh Shilliang haduh katta katta na ka bynta ki Khasi bad Jaiñtia, kumta kane ka dei ka kabu bah ïa ki paidbah baroh ban ïoh ïa phylliew jingmut lang ha kane ka Dorbar.
