SSA Champions Cup 2026: Khur ka Sei La Sap bad ka Mawkhar ïa ka jingjop ba nyngkong

Shillong, Naiwieng 11: Ka Sei La Sap FCC bad ka Mawkhar SC ki la pynneh pynsah ïa ka jingkyrmen jong ki ban ïohrung sha ka semi final ha ka lympung SSA Champions Cup 2026 da kaba jop ïa la ki jong ki jingïakhun jong ka Group B hynne ka sngi Balang.
Ka Sei La Sap (ba wan ba-ar ha ka Fourth Division mynta u snem) ka la hap ban wanphai na ka shi kol ban pynliem ïa ka Sohryngkham (ba wan ba-ar ha ka Second Division) da 4-2 kol ha ka jingïalehkai ba nyngkong. Nangta ka Mawkhar SC (lahduh jong ka First Division) ka la pynliem ïa ka Sanmer SC (lahduh jong ka Third Division) da 2-1 ha ka jingïalehkai kaba bud.
Kumba long ha kiwei pat ki jaka ha nongbah Shillong, ka madan Polo ka la shah ktah jur ha u phria bad kane ka la pynslem ïa ka jingsdang jong ka jingïalehkai ba nyngkong da shiteng kynta. Hynrei kane kam shym la pynthut ïa ka Sohryngkham, kaba la pynkhihjar dang kloi mar ïa sdang lyngba u Damanglangki Makdoh (2’) ban lamkhmat ïa ka kylla step.
Ka kol pynïakhaid ka la urlong tang mar ïa sdang biang ka jingïakhun ha ka kylla miet lyngba u Kennyson Khyriem (49’).
Nangta ka Sei La Sap, kaba ïakhun ïa ka jingïalehkai ba nyngkong jong ki, ka la ïoh ba kan lamkhmat na ka kol jong u Freestar Kharbangar ha ka minit kaba 75. Kane ka kol kam shym la neh slem, ha kaba u Bankynshew Warjri (79’) u la ïohlad ban pynïakhaid shipor na ka bynta ka Sohryngkham.
Hynrei ka Sei La Sap ka la pynskhem ïa ka jingjop da kaba bynrap sa ar tylli ki kol lyngba u Eddiesius Kharkongor (85’) bud sa ka kol kaba saw ha ka minit pynjlan na u Melbertson Kharbangar (90’+6).
Lah ban kdew ba kane ka long ka jingïalehkai kaba pynduh jingkyrmen ïa ka Sohryngkham, kaba la sdang ïa ka Champions Cup da ka jingjop pyrshah ïa ka Mawkhar ha ka taïew ba ladep.
Ha ka jingïalehkai kaba bud, la sakhi ïa ka Mawkhar kaba la iehnoh shadien ïa ka jingshah rem ha ka jingïakhun ba sdang ban khur 3 point pyrshah ïa ka Sanmer.
U Vobisterfield Marngar (35’) u la thep ïa ka kol ba nyngkong na ka bynta ka Mawkhar kaba la pynlong ïa ka kynhun ban lamkhmat ïa ka kylla step da 1-0. Nangta u Mackiven Shyrkon (69’) u la pynjlan ar shah ïa ka kol lamkhmat ha ka kylla miet shuwa ba ka Sanmer kan ïoh ban pynphai shi kol lyngba u Isharwer Mukhim (71’).
Na ka liang jong ka Sanmer, ka la pyrshang katba lah ban pynphai ïa ka kol kaba ar hynrei kam shym la ïohlad satia, kaba la pynlong ïa ka kynhun ban mad ïa ka namrem kaba ar hadien ba liem da 1-0 kol ha ka Shillong Lajong FC ha ka taïew ba ladep.
Ki jingïalehkai jong ka Champions Cup kin wanphai biang ha ka sngi Saitjaiñ. Ha ka por 11 baje mynstep ka Lajong kan ïakhun pyrshah ïa ka Sei La Sap ha ka Group B bud sa ka jingïakhun hapdeng ka Mawlai SC pyrshah ïa ka Mawpdang SC ha ka por 2:30 baje nohphai sngi ha ka Group A.