Jemkhnap ka Mawten SC ka lahduh ha ki lai snem kynthih ha ka Super Division ha ka Mawlangwir SC da 3-0: MDSA

Mawkyrwat, ‘Naiwieng 11, 2026: Ka Mawkyrwat District Sports Association (MDSA) ha ryngkat ka jingïatreilang bad ka ophis District Sports Officer, South West Khasi Hills District ka la plie pyrda ïa ka samoi ïalehkai kynjatbol kaba tip kum ka ‘Super & First Division Football League jong u snem 2026 – 2027 ha Madan MDSA Artificial Turf, Nonglang, South West Khasi Hills District.
Lah ban kdew ba ha kane ka lympung ïalehkai kata ha ka Super Division ki don 8 tylli ki kynhun bad ha ka First Division pat ki don 12 tylli ki kynhun kiba la wan ïashimbynta.
Ha ka jingïalehkai jong ka Super Division, ka Mawlangwir Sports Club kaba dei ka kynhun kaba dang shu kiew thymmai sha ka Super Division ka la pynliem haduh 3 – 0 kol pyrshah ïa ka Mawten Sports Club kaba dei kawei na ki kynhun kaba bat ïa ka nam lahduh haduh lai snem kynthih.
Ïa ki lai tylli ki kol jong ka Mawlangwir Sports Club la ïoh ban thep da u Milford Wanniang, u Arrowstar Wanniang bad na u Lastbornson Marweiñ.
Ha ka jinglehkai ha ka First Division ka la long hapdeng ka Rangjadong Sports Club pyrshah ïa ka Mawthong Sports Club ha kaba ka Mawthong SC ka la khur ïa jingjop da 2 – 1 kol bad ïa kol la ïoh ban thep da u Pyndap Lyngdoh Mawlot bad na u Samfilstar Wanniang.
U Bah Carness Sohshang, MDC barim ka Mawkyrwat Constituency uba bat mynta ïa ka kam kum u Co- Chairman Meghalaya State Development Reform Commission u la long u Kongsan.