Nongstoiñ, Rymphang, 02: Ka Hynñiewtrep Youth Council (HYC) Mawshynrut Circle, ka la lap ba ka don ka jingpyndonkam bakla ïa ka skhim Nongrep lane ‘FOCUS’ jong ka Sorkar MDA ha ka thaiñ Mawshynrut, namar ka jingïaid lait ïa ki kyndon ba la buh ha kane ka skhim.
Ka HYC Mawshynrut hapoh ka jingïalam u President samla Losbingnel Lyngkhoi, la ong ba kane ka long katkum ka jingshem jong ka seng lyngba ka Right to Information (RTI) ba la pan halor ka jingsam ïa ka skhim FOCUS, kaba dei da ka song pisa kyrpang sha ki paid Nongrep ka thaiñ.
U la ong ba katkum ki kyndon, ki briew ba dei hok ban ïoh ïa kane ka skhim ki dei tang ki Nongrep kiba hap ban thaw ïa ki producer group. U la ong ba haduh mynta, haduh 111 tylli ki Shnong ki la ïoh jingïarap na kane ka skhim bad kiba la ïoh jingïarap ki long tang marwei shi ïing.
“Haduh T. 1,45,40,000 ka pisa la dep ban sam sha ki nongrep bad ïa kane ka pisa la pynthep ha ki account jong ki producer group kaba la mang T 5000 uwei u nongrep”, u la ong haba sot ïa ka jubab katkum ka RTI ba ka seng ka ïoh.
U la ong ba ka jingsam ïa ka skhim ka long kaba bakla, namar ki don ki longïing kiba la ïoh 2 ngut na kajuh ka Ïing. Don ruh wat ki nonghikai skul bad ki nongtrei contract kiba ïoh ïa ka pisa na ka skhim FOCUS. Kaba paw ka long ba la shu jied briew katba sngew bit ban sam ban ai, ym ban da leh katkum ki lynti kiba dei ban leh.
“Ka HYC Mawshynrut kan dang ïai buddien halor kane ka kam ha kaba ka maham ba lada ka seng ka dang lap biang ïa ka jingleh bakla, ka seng kan sa leh ïa kaba donkam. Ngi tip shai ba kane ka skhim kam dei ka MLA ne MDC skhim hynrei ka dei ka skhim ki paidbah ba la ai da ka Sorkar”, u la ong.
