Tuid ki longkmie ha ka jingïalang jong ka AMPTCP Mawkyrwat Block ha Mawkyrwat

By Mawphor News Desk On Feb 3, 2023

Mawkyrwat, Rymphang 02: Ki longkmie kiba hapoh ka Women’s Wing jong ka All Meghalaya Pradesh Trinamool Congress Party (AMPTCP) Mawkyrwat Constituency ryngkat ki nongkyrshan jong ka, mynta ka sngi ki la pynlong ka jingïalang paidbah ha madan jong ka Nativity Higher Secondary School, Mawkyrwat ban pynsngew ïa ki katto katne ki mat treikam jong ka party bad kumno ban pynkhlaiñ ïa ki jingtreikam hadeng ki para longkmie.
Ha kane ka sngi, la ïadonlang naduh ka kong Kathleen Marbaniang, Vice President bad ka kong Mary Tiewla, Joint Secretary ka Mahila jong ka All Meghalaya Pradesh Trinamool Congress Party (AMPTCP), Shillong ha ryngkat u kyrtong jong ka AMPTCP Mawkyrwat Constituency, u bah Sounder Strong Cajee.
Ha kane ka sngi na ka liang ki longkmie kiba la don bynta ban ai ïa ki jingkren ba kynthup ïa ki nongïalam napoh ka Central Body ki la ban jur ba ka ri bad ka jaidbynriew mynta ka donkam palat ïa ki nongïalam kiba bha, kiba stad, kiba don ka bor halor lade bad ki nongïalam kiba don khamtam eh ïa ka jingkitkhlieh. Kumta, ki la buh ka jingkyrpad ïa ki para longkmie bad kumjuh ruh ïa ki paidbah jong ka Mawkyrwat Constituency ba kin ïa mihshakhmat ban ban ai ka jingkyrshan da kaba jied ïa kum kita ki nongmihkhmat khnang ba kan long lawei jong ka ri bad ka jaidbynriew kan long kaba don ki jingkyrmen ha kiba bun ki liang.
Namarakata, ki la buh ruh ka jingkyrpad ryngkat ka jingpynkynmaw ba ki paidbah kin ïa mih ha ka 27 tarik mynta u bnai ban leit thep ïa ka vote jong ki da kaba ñion ha ka shap kaba don ka dur jong ki ar tylli ki syntiew.
Katba ha ka jingkren ai mynsiem jong u kyrtong ka AMPTCP Mawkyrwat Constituency, u bah Sounder Strong Cajee u la ong ba kum ki longkmie ki don ïa kata ka bor na ka bynta ka lawei jong ka ri bad ka jaidbynriew ha kiba bun ki jingïaleh bad kin sa pyni ruh ïa ka bor ha ka sngi ban thep ïa ki vote jong ki ha kine ki sngi ban sa wan kata ha ka 27 tarik mynta u bnai kaba donkam ka long ba kin long ki longkmie kiba skhem. Ha kajuh ka por u kyntu ruh ba ban ïoh ïa ki jingkylla ha kiba bun ki liang la ka long ha ka ïoh ka kot bad kumno ban wanrah ïa ka jingim kaba thymmai kaba donkam ka long ka jingïatreilang, ka jingieit, ka jingtrei shitom ban pynpoi ïa ka jingïaleh sha ka thong jong ka jingjop.
“Kin sa don ki ban wan pynbiej ïa phi, phin sa klet ïa ka lawei, phi kynmaw ïa ka mynta, phin shim ïa kata ka jingai bad kata ka jingai ka long ba kin thied ïa phi bad pynkylla ïa phi, ïa ki jingmut jingpyrkhat”, ong u bah Sounder bad kynmaw ko ki paidbah ba ki dei ban long kiba ïeng skhem ha ka nongrim kaba shisha ban nym shah pynbeit ha kata ka 10 bajar na ka bynta ki 5 snem hynrei ki dei ban da pynshong nongrim bha shwa ban poi kata ka sngi khnang ba kan nym long ka jingbabe.
Ha kajuh hi ka sngi na ka liang ka AMPTCP Mawkyrwat Block ka la ïoh ban pdiang burom ïa u bah Diverland Lyngdoh ban long u nongkyrshan ba pura jong ka party naduh mynta ka sngi ha ryngkat ka jingsakhi lang jong ki paidbah nongkyrshan.
Nangta, ka MCSEPAC ka la ïoh ruh ban pynkup burom ïa ki ar ngut ki longkmie kiba dei ki nongmareh kiba la wanrah ka nam ka burom ïa ka dong ka thaiñ, ka ri bad ka jaidbynriew baroh kawei ïa ka kong Kmoiñ Wahlang bad ka kong Snora Lyngkhoi.
La pynshongshit ïa da ki jingshad bad ki jingrwai na ki katto katne ki unit kiba hapoh jong ka AMPTCP Mawkyrwat Block.