Ba phet u Martin Danggo sha ka BJP, tyrwa ka NPP sha ka State Election Commitee da ka kyrteng u Nelbi bad Kitborlang Nongrem

Mawkyrwat, Rymphang 02: Mynta ka ka sngi ka 2 tarik u Rymphang, 2023, ka National People’s Party (NPP) hapoh jong ka Ranikor Block Unit ka la pynlong ka jingïalang ba kyrkieh ha shnong Mawthynrew-Rangthong, South west Khasi Hills District na ka bynta ban jied thymmai ïa ki nongkitkam bad kumjuh ruh ban ïa pyrkhat kumno ban leh nangne shakhmat ha kaba ïa dei bad ka MLA Election jong mynta u snem.
Lah ban kdew ba kane ka jinglum ba kyrkih jong ka NPP Ranikor Block Unit ka dei hadien u u Martin M. Danggo, President ba rangbah jong ka NPP Ranikor Constituency uba la dep ban pynbna ruh ba un long u kyrtong na ka NPP Ranikor Constituency u la dep ban ieh noh shadien ïa ka NPP bad leit ban pynïasoh pat sha ka BJP ha ryngkat ki nongbud jong u ha kine ki khyndiat sngi.
Hadien ka jingïakren ba sani halor kiba bun ki kam, la pynlong ruh ka jingjied thymmai ïa ki nongkitkam jong ka NPP Ranikor Block Unit ha kaba la jied President ïa u bah Nelbi T. Sangma ban peit ïa ka bynta ka Ranikor Block Unit bad kumjuh ruh ïa ki nongkitkam jong ka NPP Youth’s Wing bad Women’s Wing ha ryngkat bad kiwei de ki nongkitkam ba ha khmat jong ki unit.
Ha kane ka sngi ki la shim ruh ïa ki ar tylli ki rai, kata na ka bynta ban jied thymmai ïa ki nongkitkam jong ka party bad kumjuh ruh ban ïa rai ban pynmih la u jong u kyrtong ha ka jong u bah Martin M. Danggo.
Haba kren ha ka jingïalang ba lyngkot, u bah Kitborlang Nongrem, President jong ka NPP South West Khasi Hills District u la kyndit kumba ïuh tdong bseiñ nar namar ha i por ba lyngkot u la ïoh jingtip halor ki khubor ba u Martin M. Danggo u la mih noh na ka NPP bad ban leit pynïasoh pat sha ka BJP ha ryngkat ki nongbud jong u ha kaba baroh shikata ki ïa burom mar kylliang khlem don kano kano ka jingïasngewpher jingmut pynban ki ïatreilang na ka bynta ban pynkhlañ ïa ka NPP hapoh ka Ranikor Constituency bad kumno ban pynkhreh ïa kane ka MLA Election 2023. U bah Kit u la pynpaw ba watla ka la don ka jingshah kren ba ha Ranikor Constituency kam don party NPP shuh hynrei mynta ka sngi ka la paw shai ba ka NPP ka don bad ka dang im wat hadien ba u Martin M. Danggo u la leit noh sha ka BJP.
Ha kajuh hi ka sngi ki paidbah jong ka Ranikor Constituency da kawei ka sur ki la ïa rai ban pynmih kyrtong na ka kane ka party NPP bad ki la ïa rai ruh ban pah ïa ki ar ngut ki kyrteng kata ïa u bah Kitborlang Nongrem bad u Nelbi T. Sangma kum ki kyrtong na ka NPP jong ka Ranikor Constituency ban mih sha ka MLA Election 2023 bad ïa ka rai ba khadduh ka NPP Ranikor Block Unit kan rah ïa kane ka khubor sha ki bor ba halor ha ka Central Body ba kin ïa shong pyrkhat bad u National President bad u National Vice President jong ka NPP.
Ha kane ka sng la ïadonlang u bah H.S. Diengdoh u kyrtong na ka Mawkyrwat Constituency, ki nongïalam ba hakhmat jong ka NPP jong ka Ranikor Blcok, ki ‘riew rangbah, ki longkmie bad ki paidbah nongkyrshan jong ka party.