Ngam dei shuh ka dur khmat thymmai ïaka Umroi, ka rai ban mih madan ban aireng kam pat slem: SW Rymbai

Nongpoh, Rymphang 02: Hadien bala mih ka jingkynnoh naki ba bun ki paidbah jong ka Umroi Constituency ba ka jingmih jong u Bah Stanlywiss Rymbai kum u kyrtong ka Congress ban aireng ha kane ka elekshon ba mynta sha ka ïing Dorbar thawaiñ kala long dier por bad kumba long haduh mynta ka seng Congress kam pat khih win ha Umroi Constituency, u Bah Stanlywiss Rymbai mynta ka sngi hadien bala dep ban thep kyrteng u la pynshai ba kum u kyrtong ban aireng ha kane ka elekshon ba mynta um dei shuh ka dur khmat thymmai ïaka Umroi bad u la jop ruh kum u MLA ka Umroi la 2 sien.
U la ong ruh baka jingmih jong nga kam dei ka jingmih dier por bad ngala ioh ban thep kyrteng mynta ka sngi, bad ka party Congress ka dei ka party kaba la don lypa ha Umroi Constituency, bad kum u nongmih khmat ngala shim ïaka bynta la kumba 9 snem bad ki paidbah kila ithuh bha ïanga, bad ngam artatien ba ka party Congress kan wan biang haka bor ha Umroi Constituency bad khamtam ha Ri-Bhoi baroh kawei namar ki paidbah ki don ka jingkyrmen bad ka jingïeid kyrpang ïaka seng Congress.
U Bah Stanliwiss Rymbai u la kyrpad ruh sha ki paidbah ka Umroi kumba kila pynjop ha u snem 2003 bad 2008, ba kin jied biang ha kane ka kynti hadien ba u la mih shakhmat ban aireng biang namar u don shibun ka thong bad ka jingangnud ban wanrah ki jingkylla ïaka Umroi Constituency baroh kawei.