Jowai, Rymphang 02: Kum shi bynta ka jingpynïaid beit pynïaid ryntih ïa ka General Election sha ka Meghalaya Legislative Assembly, 2023 bad ruh ka jingbud ïa ki kyndon (Standard Operating Procedure) kaba ïadei bad ka jingkurup bad jingpyllait ïa kino kino ki mar katba dang ïaid ka Model Code of Conduct khnang ban lait na kano kano ka jingbym ïasngewthuh jingmut jong ki paidbah na ka liang jong u District Election Officer, West Jaiñtia Hills ula pyntip ba la thaw ïa ka komiti kaba kyrpang kaba peit ïa kane ka kam kaba la tip kum ka ‘District Committee For Examining Cases of Seizure’.
Ïa kane ka Committee yn khlieh da ka kong E. L. Warjri, MCS, Additional Deputy Commissioner, kaba dei ka Project Director, DRDA kum ka Chairman.
Ka kong H.M.L. Kynta, MCS, Additional Deputy Commissioner, kaba dei ka Nodal Officer for Expenditure Monitoring kan long ka Convener bad u ma S. Kshiar, MFS, uba dei u Treasury Officer un long u dkhot ka Committee.
Kane ka Committee ka don ka bor ban peit hi dalade ïa kino kino ki mar kiba la ïoh ban kurup da ki Pulit, ne da ki Static Surveillance Team lane ki Flying Squad. Ka Committee kan peit bad bishar ïa kine ki kam bad lada ka lap ba kam don kano kano ka FIR lane ka jingujor kaba la buh pyrshah ïa kine ki mar bala ïoh kurup bad lada kim don kano kano ka jingïadei bad ki kyrtong ne ki seng saiñhima sima lane ki election campaign bad kino kino ki kam elekshon katkum ki kyndon ka SOP na ka liang ka Committee kan ai hukum ban pyllait noh ïa ki mar mar la kadei ka pisa ne kino kino ki tiar sha kiba dei trai hapoh ka 7 sngi.
Ïa kane ka Committee la ai bor ban peit ïa baroh ki case kiba ïadei bad ka jingïohkurup bad ka lah ruh ban ai ka rai ha kano kano ka por ba donkam.
