Yn leit shim bynta ki samla pule ka USTM sha Global Entrepreneurship Summit ha IIT Kharagpur

Nongpoh, Rymphang 02: Kumba 34 ngut ki samla pule jong ka skulbah University of Science and Technology Meghalaya (USTM) mynta ka sngi kila mih na katei ka skulbah ban leit shim bynta haka Global Entrepreneurship Summit (GES), bala pynlong da ka Entrepreneurship Cell (E-Cell), IIT Kharagpur ka ban sdang naduh ka 3 tarik haduh 5 tarik mynta u bnai.
Ïa kitei ki samla pule ba jied kyrpang na katei ka skulbah la synran lang ruh da ki 3 ngut ki nongïalam ba kynthup ïaka Dr Deboja Sharma, Dr Mautushi Das bad Dr. Alamdar Husain bad kitei ki samla pule ki ban leit shim bynta sha katei ka jingïalang bah ki dei naka tnad pule Biology, Botany bad Pharmaceutical Science.
Haba kren halor katei ka jingleit shim bynta ki samla pule jong katei ka skulbah sha katei ka jingïalang bah ka ban long ha IIT Kharagpur naka liang u M Hoque Chancellor ka USTM u la ong ba ngi ju ai mynsiem ïaki saml pule ba kin trei shitom ban pynïar ïaka jabieng bad ka jingmut jingpyrkhat bad khlem pep katei ka jingïalang bah kan long ka jingkyrkhu bad ka jingmyntoi ïa kitei ki samla pule ban ïakynduh bad kiwei ki samla pule na ki ri ka pyrthei ban sam ïaka jingstad.
U la ong ruh lyngba kum kitei ki jingïalang kan pynkhraw ïaka jingmut jingpyrkhat jong ki samla pule ki ban tip shaphang ki ri ka pyrthei kumno ki treikam khamtam ban ioh ban mir jingmut, ban sam ïaki jingstad kumba ha katei ka jingïalang bah kan don ruh ka jingpyni nam ïaki jingpule jong ki bad ka jingstad ba ki samla pule kila pynkhreh ban pynpaw pyrthei sha katei ka jingïalang.