Da ka Kids’ Graduation cum Parents’ Day la pynlong ha St. Francis D’Assisi School, South West Khasi Hills

By Mawphor Editor On Nov 10, 2026

Mawkyrwat, Naiwieng 09 : Ha ka sien ka banyngkong ha ki thaiñ Shiliang-Umrilang jong ka South West Khasi Hills District, ka Skul St. Francis D’Assisi, Tynsom-Mawthawïang, ka la pynlong ïa ka Kids’ Graduation lane kata ka jinglehburom ïa ki khynnah-rit kiba la pyndep ïa ka kyrdan Kindergarten.
La pynlong ïa kane ka program ha ka jingïadonlang jong ki kmie ki kpa bad ka la long kaei kaei kaba pynshlur ïa ki khynnah jong kane ka thaiñ ban sngewtynnad ha ki jingpule.
U Bah Kynphamlin V. Kharlyngdoh, Lawyer & Advocate, Supreme Court u la long u Kongsan ban pynkup-burom ïa kine ki Khynnah-rit, ha ka jingïadon-lang jong u Brother Barnabas Lyngdoh CMSF na Nongstoiñ, kum u symbud kongsan, u Brother Collinsius Wanñiang CMSF, Manager & Vice-Provincial of North East India, Brother Barles Lyngdoh CMSF, Principal jong ka Skul, Ki Nonghikai, Ki Kmie ki Kpa bad ki Khynnah Skul baroh kiba la pynkhreh bha ïa ki Prokram da ki Sap ki Phong jong ki.
Ha ki kyntien sbai – kyntien kynpham jong u, u Bah Kynphamlin u la pynshlur ïa ki Khynnah bad ïa ki Kmie ki Kpa ban shimkhia ïa la ki jong ki kamram ban poi sha ka thong. U da pynshlur ba ka Meghalaya,
sa tang katno kan sa poi ha ka 100% ha ka Jingnang Jingstad.
“Kine baroh ki dei namar don ki Skul Mishon kum ka St. Francis D’Assisi kiba la trei borbah ban pynkiew ïa ka jingnang jingstad”, ong u bah Kynpham
Kum ban shu kdew hangne, kane ka Skul St. Francis D’Assisi, ka la nang kiew shakhmat naduh ka por ba la sdang ha u snem 2017 ha kaba ki Khynnah ba ïa leh eksam Matrik na kane ka Skul ki pass beit 100% bad don ka jingsngew jong ki briew kane ka thaiñ ba kane ka skul kan long ka dongmusa ban tbeh jingshai ha kane ka Dong Shiliang-Umrilang.
Ym tangkata, katno ki briew ki sngewsarong ban ïoh ïa kum kane ka Skul ba la pynïaid da ki Franciscan Missionary Brothers – kiba pynïaid ïa ki Skul-bah kylleng ka pyrthei ha kaba ki la long da shisha ki jingkyrkhu ïa ki shnong ki thaw khamtam eh ha ki jaka nongkyndong.