Mih biang ka jingïakynad ki dkhot ka TMC bad NPP ha Phulbari ba pynheh jingtem u kyrtong

0

Tura, Rymphang, 16: Arngut ki nongkyrshan jong ka National Peoples Party (NPP) ki la mynsaw hadien ka jingshah thombor ha ki nongkyrshan ka Trinamoo Congress ha ka sngi Balang ha ka shnong Borshibanda hajan ka ing sah jong u kyrtong ka TMC na Phulbari Constituency. Kane ka la jia ha ka por kumba 8:17 baje janmiet.
Ki Pulit ka Phulbari Police Station kiba la ïoh jingtip ba katto katne ki nongkyrshan ka TMC hapoh ka jingïalam jong u Bhutto bad kiwei kiwei ki la ktah kti ïa ki nongkyrshan jong ka NPP mar mar ki la hiar kyrkieh hapoh ka jingïalam jong u SDPO ka Dadenggre, u CI (W) Phulbari bad u OC ka Phulbari PS ban pynlong ïa ka jingtohkit.
Ha kane ka por ki Pulit ki la lap ba ki don kumba 150-200 ngut ki briew kiba ïalum hakhmat ka ing jong u kyrtong ka TMC na Phulbari Constituency bad lap ruh arngut ki briew kiba la mynsaw ïa kiba la tip kyrteng kum u Md. Joynal Abedin bad u Md. Aynal Haque kiba la phla ba ki la shah ktah kti ha u Sofiqul Islam ba ju khot sin u Bhutto, u Abdul Ahmed, u Mukul, u Shahajahan, bad kiwei kiwei. Da ka jingphla jong kine ki arngut, ki Pulit ki la rah noh sha u Sofiqul Islam sha thanat.
Hynrei, ki paidbah ki la ker kut ïa ki Pulit bad pyrshang ban thombor sa ïa ki. U Sofiqul Islam uba dei u bahaing ba ïajan tam bad u nongkyrshan jong u kyrtong ka TMC u la ïoh phet krad da kaba shim kabu ïa ka jingker kut ki paidbah ïa ki Pulit. Ha kane ka por, uwei u briew bym pat lah ban tip kyrteng uba kynshoit ïa ki paidbah ban thombor ïa ki Pulit ruh u la shah kem.
Hadien ba ki Pulit ki la mih noh na ka jaka ba la jia ka jingïahuri hura bad ki briew kiba la shah bat bad kynthup ruh kiba la mynsaw sa shi kynhun ki paidbah ba la ïalam da ka Hasina Zaman (ka kurim jong u kyrtong ka TMC) ki la khang kdong ïa ki Pulit ha surok Bholarbhita. Wat hadien ba la hukum ba kin ïa pra noh la ka jong ka lynti hynrei kim shym la sngap satia bad shimti jubor ïa ki briew kiba la shah rah ha ki Pulit.
Da ka said, ki Pulit ki la ïohlad ban pynkit noh ïa ki arngut kiba mynsaw, u Md. Joynal Abedin bad u Md. Aynal Haque sha Phulbari CHC. Ha CHC, sa arngut kiba la mynsaw, kynthup ïa kawei ka khynnah kynthei ki la wan mih sha hospital.
Napdeng ki saw ngut, lai ngut kiba la kham heh ka rta ki la mynsaw malu mala, katba ïa ka khynnah kynthei la pynkit noh kiwei ki jaka ai jingsumar hadien ba la suba ka la kheiñ khylliah ka kjat.
Tang shu ïoh jingtip na u Officer In-Charge, ka Phulbari PS, mar mar la pan jingïarap na ki Pulit jong ka Rajabala Police Station bad kumjuh ruh na Bogularbhita Out Post ban tem ïa kane ka jingïakynad.
U Zonal Magistrate, ka kynhun FST/SST bad u Assistant Commissioner ki la hiar sha ka jaka ba ïakajia da ka jingsynran lang jong ki Pulit.
Ki Pulit ki la ujor da ka ejahar ha Phulbari PS hapoh ka Section 147/ 149/ 186/ 188/ 189/ 224/ 225/ 332/353 jong ka Indian Penal Code (IPC) bad sa kawei pat ka ejahar hapoh ka Section 120B/144/ 307/ 326/ 427/ 448/ 506 jong ka Indian Penal Code (IPC) (katkum ka ujor ba la mudui da u Joynal Abedin pyrshah ïa ki 32 ngut ki briew kiba dei ki nongkyrshan ka TMC). Ki Pulit ki la register ïa ka case bad pynlong ruh ïa ka jingtohkit.
Kat haduh mynta ki Pulit kim shym la kem ïano ïano ruh kat haduh ba la thoh ïa kane ka khubor.
Ki bor synshar district ki la phah ruh shi kynhun ki Pulit ka Sorkar Pdeng sha ka shnong Borshibanda ban pynneh ïa ka shongsuk shongsain bad la thaw ruh ka ka Peace Committee ban wanrah biang ïa ka jingïasuk hapdeng ki ar liang mamla.
Ha ka jingtohkit, la shem ba ki briew kiba donkti ha kane ka jingïashoh ki dei hi ki bahaing hasem bad kiba shong basah marjan bad ka iing jong u kyrtong ka TMC na Phulbari Constituency.
Kiba shah shohh ki dei ki nongkyrshan ka NPP bad ka la don teng ka jingïahuri hura hapdeng jong ki bad ki nongkyrshan ka TMC ha kan eka shnong na ka daw ka saiñpyrthei.
La kynnoh ba u kyrtong ka TMC u la tem pynheh da ka sur jingrwai ha ka por kumba 7-8 baje mynmiet hynrei wat haba kiba marjan ki la kyrpad ban sangeh tem jingrwai na ka daw ka jingpynthud ïa ki khun ki kti kiba dang khreh kot ban pynkhreh ïa ka eksamin hynrei ha ka jaka ban ïapynbeit ïa kane, u Sofiqul Islam uba ju khot sin, u Abdul Ahmed, u Mukul, u Shahajahan bad kiwei kiwei ki la ktah kti pynban.
Ynda ki Pulit ki la poi ha kane ka jaka, uwei u briew u bym lah ban tip kyrteng u la phah khubor lyngba ka SMS ha ka WhatsApp Group jong ka TMC Phulbari bad kumjuh ruh ha ka WhatsApp Group jong ka TMC District ban ïamih paidbah.
Na ki jinglum jingtip, la shem ba u Sofiqul Islam uba ju don teng ki dak sniew u dei uba donkti ha kane kajuh ka jingjia. U dei uba la donkti ha ka jingïahuri hura dang shen ha ka shnong Charbatapara ha ka 7 tarik, Rymphang, 2023. U la shah kem ruh ha kane ka jingjia bad shah hukum ban pyndem da ka Iingbishar hapoh ka Section 107 CrPC.

Leave A Reply

Your email address will not be published.