Lada phi kyrshan ïa ki kam beaiñ vote ïa ki party ha ka MDA: HITO

U MLA jong phi u phla ba u pynbiej man ka san snem bad u la kren jemdaw ia ka jaidbynriew

0

Pynursla, Rymphang 16: Ka seng Hynñiewtrep Integrated Territorial Organization (HITO) ha ka sngi Palei ka la hiar sha Pynursla ka Constituency ba la mih khmat da u Bah Prestone Tynsong uba long ruh u Symbud Myntri Rangbah ka jylla ban pynlong ïa ka jingpynshai paidbah halor ka jingjied ïa ki nongthaw aiñ bad ka kamram kaba ki nongthaw aiñ ki dei ban leh hadien ba ki paidbah ki la pynkhamti ia ka lyngkor.
Haba kren ha ka jingïalang pynshai paidbah ba la pynlong ha Parking Lot Pynursla u President ka HITO u Bah Donbok Dkhar u la kyntu ïa ki paidbah ba ha kane ka kynti kaba mynta kin jied da ki nongmih khmat kiba stad ban thaw aiñ ban ban kren ïa ka ishu ka jaidbynriew ym ïa kita kiba ai pisa.
“Shuwa ba phin leit ban vote kynmaw ba ka vote jong phi ka rai ïa ka lawei ka jaidbynriew bad ki khun ki kti jong phi na kata ka daw da pynshong nongrim bha ïano phin phah sha Assembly ban leit thaw aiñ na bynta jong phi bad ki pateng ban dang wan,” u la ong.
“Lada phi kyrshan ïa ka jingsiat ïap u Bah Cheristerfield Thangkiew shiteng synïa ha ïing jong u, lada phi kyrshan ïa ka jingpynthiah surok ïa ki nonghikai kiba ai jingnang jingstad bad ruh ïa ka jingshah siat bom pynsat khmat ïa ki, lada phi kyrshan ïa ka CAA kaba ka MP ka NPP ka la mynjur lang ha Parliament, lada phi kyrshan ïa ka jingbym ai ILP, lada phi kyrshan ïa ki High Level, ka casino…ha ka 27 tarik ai ka Vote jong phi ha ki party ba don ha ka MDA ba kynthup naduh ka NPP, UDP, HSPDP, PDF, BJP..tangba kynmaw wat khñium shuh kaei kaba ki leh hadien ka elekshon hynrei risa beit bad hun beit kat kaba phi leh namar phi la ïohi kaei kaba ki leh ha kine ki 5 snem,” u la bynrap.
Haba kynthoh ïa u Symbud Myntri Rangbah ka jylla uba dei ruh u MLA kane ka thaiñ u Bah Prestone Tynsong, u Bah Donbok u la ong ïa ki paidbah, “Lada phi sngewïahap ba ha ka kordit khait namar ka jingkhang dam ha u 2020-21 kaba tang ban mih sha iew ym ïoh lad shuh bad ka kamai ruh kam don shuh ba u Symbud Myntri Rangbah un wan ong ïa phi bam tang ka ja bad u jhur bad lada phi pynskhem ïa kaba u ong Ngi Pynbiej man ka san snem bad ki nongop ruh man ka san snem pynjop donburom biang ïa u hynrei ngi kum ka seng te ngim kit ram shuh lada ngim mih shuh shakhmat ban ïakhih ïa ki jingeh kaba kum ka jaidbynriew ka ïa kynduh namar phi la biej hi bad phi la ngop hi wat hapdeng ka bor sngewthuh kaba shai,” u la ong.
Shuh shuh u la ong ba na ka liang jong u shimet um lehraiñ ban kren ïa ka jingshisha, “Ngam len bad ngam lehraiñ ban ïathuh ba nga shimet nga kyrshan ïa u Prah ka VPP namar nga ïohi ïa ka jingkyrmen ïa ka jaidbynriew ha kane ka party ba ïalam da u Bah Ardent,” u la ong.

Leave A Reply

Your email address will not be published.