Yn pynlynguh u Nelly, Khalid, Boyslikegirls nalor ki nongrwai ka Jylla ha ka Cherry Blossom

Sdang budlang ki jylla ba marjan ïa ka Meghalaya

0

Shillong, Naiwieng 16 : Ka tamasa  Cherry Blossom mynta u snem kan long ha ka 20 bad 21 tarik Naiwieng ha Madan Kurkalang, Bhoi Rymbong, da kaba wanrah ïa ki nongrwai ba pawnam ha ka pyrthei bad ai lad ruh ïa ki nongrwai ka jylla ban pyni ïa la ka sap ha ka rynsan paidbah.
Ha kane ka tamasa kaba la khmih lynti ban poi palat 50,000 ngut ki nongwan, ka Jylla kan sakhi ïa ki nongrwai ba pawnam, kynthup ïa u Nelly, Khalid bad Boys Like Girls, Eliot, James Reay nalor ki nongrwai ba pawnam ka Ri kum u Darshan Raval
Haba kren bad ki lad pathai khubor, u Myntri ka tnad Tourism ka sorkar jylla, Bah Paul Lyngdoh u la pyntip ba mynta ka kynti la ailad kyrpang ruh ïa ki nongrwai ba pawnam kum ka Jessie Lyngdoh, Daminot, Leonard, Meban, Mark Ryan bad kiwei kiwei ban pynshongshit lang.
Ha kajuh ka por, yn ai lad ruh ïa ki nongrwai bad ki kynhun tem na Meghalaya, kynthup ïa kynhun Daminot, Leonard, Meban, James Ray bad Jessi Lyngdoh, ban ïasam ïa ka rynsan bad ki nongrwai ba pawnam.
“Kane ka lympung ka dei ka bynta kaba kongsan ban kyntiew ïa ka Meghalaya ha ka liang ka put ka tem bad ruh ban kyntiew ïa ka rwai ka siaw kaba don ïa ka ïoh ka kot ïa ka jylla bad kumjuh ïa ka thain shatei lam-mihngi jong ka ri kumjuh,” ula ong.
U la pynpaw ba ha u snem ba la dep, u nongrwai ba pawnam ha ka pyrthei, Ed Sheeran, u la pynpaw ïa ka Shillong kum ka jaka kaba u sngewtynnad tam napdeng ki hynriew tylli ki nongbah ha India ba u la leit ban pynlong concert.
U Bah Paul u la ong ba ka jingtrei jong ka Meghalaya ban kyntiew ïa ka rwai ka siaw kaba don bad ka jingmyntoi ha ka ïoh ka kot ka la pynshlur lang wat ïa ki jylla ba marjan, kum ka Assam, ban wanrah ïa ki nongrwai ba pawnam ha ka pyrthei. Nangta u ong ruh ba wat ka Sikkim bad Arunachal Pradesh ruh ki la ïoh jingkyrshan na ka jylla Meghalaya ha ka jingpynlong ïa ki music festival.
“Ha ka 19 tarik Naiwieng, shuwa ban sdang ïa ka tamasa, yn pynlong ïa ka Global Music Promoters Meet, ha kaba ki riewshemphang ha ka rwai ka siaw bad ka put ka tem na kylleng ka pyrthei kin ïakynduh bad ki nongrwai ka jylla, ban ai jinghikai bad jingïarap ïa ki ban pynïoh ïa ka lad ban rung sha ka ïew jong ka pyrthei,” la pyntip u Bah Paul.
Ha kajuh ka por u Bah Paul u la ong ba ha ka tamasa Cherry Blossom ha u snem ba la dep, ka la khring palat 50,000 ngut ki nongwan ha ki ar sngi, bad na kine haduh kumba 40 persen ki dei ki nongwan jngohkai pyrthei na shabar jylla.

Leave A Reply

Your email address will not be published.