Nga buh jingshaniah ha ki paidbah ym ha ka bor pisa ban jop ïa ka elekshon MLA : Auspicious

Shillong, Rymphang 16 : Ki nongkyrshan u kyrtong ka People’s Democratic Front (PDF), Bah Auspicious Lyngdoh Mawphlang na Mawphlang Constituency sha ka elekshon MLA 2023 ka ban long ha ka 27 tarik mynta u bnai ki la ong ba jingbym shongshit khleh bieit ka elekshon ha kane ka kynti ba mynta na kane ka Constituency ka dei namar ka jingkhlaiñ u kyrtong u ba ïakhun da ka jingshaniah ha u paidbah ym ha ka bor pisa.
Ha ki jingkren jong ki ha ka jingïalang ïalap elekshon na ka bynta u Bah Auspicious ha Nongspung myn ha ka 16 tarik u Rymphang, 2023, ki nongkyrshan ki la ïalap pynsngew ba ha kane ka elekshon kin jied ïa une u kyrtong ka PDF ban leit thawaiñ sha ka ïing Dorbar ka Jylla.
Ha kane ka sngi la ïa donlang ruh da u Bah Wellbirth Rani, President barim ka Federation of Khasi Jaintia and Garo People (FKJGP), u Bah James Ban Basaiawmoit, Vice President ka PDF, nalor ki nongkitkam ka PDF Zonal Committee Mawphlang Constituency lem ki nongkyrshan.
Na ka liang u Bah Auspicious u la ong ba na ki 120 tylli ki shnong ha ka Constituency, 80 tylli ki dang kham sahdien bad 35 tylli ki dei ki bym pat ïoh surok. U la ong ba don 121 tylli ki longïing kiba ki ïing jong ki ki long kiba isangsot bad 107 tylli ki longïing kiba duna kyrduh eh ha ka ïoh ka kot.
Da kaba pynpaw ba lada u shah jied, un ïakren ban wanrah ïa ka State Agriculture Policy, ka Labour Policy, ka Commission on Employment Generaton, u Bah Auspicious u la ong ba un ïakren ban kyntiew ïa ka thaiñ ha ka pule puthi bad wanrah ki jingkylla bad bynrap ba u don jingshaniah ha ki paidbah ban jop ïa ka elekshon ym ha ka bor pisa.