Shillong, Rymphang 16: U National General Secretaty ka Seng Trinamool Congress, u Abishek Banerjee, haba kren ha ka jingïalap eleklshon ha Ampati, u la buh ka thong ne challenge ïa u Myntri Rangbah ka jylla, u Conrad Sangma ba un pynmih ïa ka Report Card halor ka jingtreikam jong ka sorkar jong u ha kine ki san snem lada u nud.
“Conrad lada phi nud sei ïa ka report treikam ha kine ki san snem baladep bad sa peit ki paidbah kumno kin jubab ïa ka jingtreikam jong phi”, la ong u Banerjee.
Hynrei u la ong ba ha kine ki san snem ka sorkar MDA hapoh ka jingïalam ka NPP ka la pheil lut ha kiba bun ki liang, hynrei mynta pat por elekshon ka NPP ka leit kylleng kylleng ban pynbieit bad ïalam bakla ïa u paidbah.
U nongïalam ba dang kham Samla ka TMC, u la ong ba ki paidbah ka jylla kidei kiba stad bad ki la ïohi ba ha kine ki san ka snem ka sorkar u Conrad kam shym la leh eiei, hynrei la shu jyllei beit tang ki kam bamsap katba shaba phai, naduh ka bamsap khaïi dewïong tuh, ka bamsap ai ding elektrik sha ki nongkyndong, ka bamsap tei ïingdorbar, ka bamsap MUDA, ka bamsap die tuh ïa u khaw baduk sha Assam bad bun kiwei kiwei.
Da kaba pan ïa ka jingkyrshan jong ki paidbah bad rah ïa ka kti jong ka Miani D. Shira, ka kyrtong jong ka TMC na Ampati, u Abhishek, u la ong ba na Ampati wat hapdeng ka jingñiom tyngeh ki heh ka NPP, kynthup ïa u Conrad Sangma, ka khun jong u Dr. Mukul Sangma kan jop da kaba suk ha kane ka elekshon 2023.
