5 lak tyngka ai u Lat ka jylla ban pynneh pynsah ïa ki riti dustur bad ki kolshor jong ki Garo

By Mawphor Editor On Nov 14, 2026

Tura, Naiwieng13: U Lat ka jylla Meghalaya u Chandrashekar H. Vijayashankar ha ka sngi Thohdieng u la pynbna ban ai jingiarap T.5 lak sha ka Hundred Drums Wangala Festival Committee na ka bynta ban pynneh pynsah ïa ki riti dustur bad ki kolshor jong ki Garo, ha ka por ba u leit ban don lang ha sngi kaba lai jong ka jingrakhe Golden Jubilee jong ki 1000 tylli ki Drums Wangala Festival haTura.
Ha kane ka jingdap 50 snem jong kane ka tamasa la sakhi ïa ki jingleh niam tynrai, ki jingrwai tynrai bad ka jingsawa jong ki hajar tylli ki ksing ba la ap khmih lynti, kaba la pynlong sa kawei pat ka jingrakhe ha West Garo Hills.
Haba batai ïa ka Garo Hills kum ka ri jong ki riewshlur bad ki nongialhun, u Lat u la ai khublei ïa ka jingnoh synniang jong ki nongialam ba nyngkong jong kane ka thain ban kyntiew ïa ka jylla Meghalaya.U la ong ba kane ka jingiarap kan kyrshan ïa ki jingpyrshang ban pynneh pynsah ïa ki riti dustur bad ki pateng jong ka imlang sahlang.
U Lamphang ka Ïingdorbar Thawaiñ ka Jylla Meghalaya, u Thomas A. Sangma, uba la wan sha kane ka prokram kum u Kongsan, u la kren shaphang ka jingïaid lynti ba phylla jong kane ka tamasa ha ki san phew snem.U la pynkynmaw ba katei ka jingrakhe kaba la sdang tang da ki 10 tylli ki ksing, ka la nang kiew sha ka jingpyni ïa ka kolshor kaba heh bha kaba la don shihajar tylli ki ksing.
Ïa kane ka prokram kaba pura la sdang da ka jingduwai ba la ïalam da u Rev. Donaldwood R. Marak, bud pat sa ka jingai sngewbha sha ki nongshah khot sngewbha.Ka Saka Choir ka la ai ïa ka jingrwai theme song jong ka Wangala, “Dimdim Dimchong Dachichong”.
Ki jingrakhe kolshor ki la poi sha ka kyrdan kaba ha khlieh duh da ka jingshad kaba itynnad bha jong ka Rhythm of Thousand Drums, bud sa ka jinglehniam tynrai jong ka Chachat Sooa, ha kaba la don lang u Lamphang ka Ing Dorbar.
Ha kane ka prokram la pyni ruh ïa ka jingrwai tynrai ba la ai da ka Bolabeta Cultural Artists Society na Ranikor bad ka jingrwai na ka kynhun ki Kids Wangala Troupe.
Napdeng kiba la don lang ki long u myntri ka tnad Excise u Brening A. Sangma, u Deputy Commissioner jong ka West Garo Hills u Vibhor Agarwal bad u chairman jong ka Hundred Drums Wangala Festival Committee u Ronald Rikman Sangma.