Ym dei ban shu kdew tang ki jingduna bad ki jingeh hynrei shimlang ïa ka jingkitkhlieh ban weng : Kyntu u CM ka Assam

Shillong, Naiwieng 14 : U Myntri Rangbah ka Assam, u Himanta Biswa Sarma u la kyntu ïa ki paidbah ba kim dei satia ban ym shu kdew ïa ki jingduna bad ki jingeh kiba don ha ka imlang sahlang, hynrei ki dei ban sdang ban shim ïa ka jingkitkhlieh bad wad ïa ki lad ki lynti ban weng ïa ki jingeh bad ban wanrah ïa ka jingkylla.
Haba kren ïa kane haba shim bynta kum u Kongsan ha ka sngi Ba-ar jong ka Golden Jubilee 1000 Drums Wangala Festival 2026, kaba long ha Tura ha ka sngi Palei, u Himanta u la ong ruh ba ka imlang sahlang ka dei ban mih shabar na ka jingmlien ban kdew tang ïa ki jingeh bad kynnoh ïa ki jingduna.
Haba kren ha ka jingïalang kaba la wan ban sakhi da bun bha ki paidbah u la ong ba kane ka thaiñ ka don ïa ka lad kaba khraw bha ban kiew stet. Tangba u banjur ba ka jingkylla kaba shisha kan sdang tang lada ki briew ki pynkylla ïa ka rukom pyrkhat bad don ka jingsngewskhem ba ka jingkylla kaba bha ka long kaba lah ban urlong.
“Ki briew ki kloi ban kdew ïa ki surok kiba sniew, ka jingduna um bad ka jingbym lah ban pynkhuid ïa ki jaboh, hynrei tang khyndiat ngut kiba kloi ban shim ïa ka jingkitkhlieh ban pynbeit ïa kine ki jingeh,” u la ong.
Da kaba pynpaw ïa ka jingshemjong u ha ki phra snem kum u Myntri Rangbah ka Assam bad kumba arphew snem ha ki kam paidbah bapher bapher, u Himanta u la ban jur ïa ka jingdonkam ban buh hakhmat ïa katto katne ki thong kiba lah ban pyndep, ha ka jaka ban pyrshang ban leh ïa baroh ha kajuh ka por.
U la ong ba ka jingithuh ïa ki lad pynbeit kiba lah ban pyntreikam, ki jingdonkam bad ki lad kiba lah ban pyndonkam mardor kan ïarap ban wanrah ïa ka jingkyrmen, pynkhlaiñ ïa ka jingshaniah bad plie lad ïa ki kam pynroi kiba kham heh ha ka lawei.
U la ban jur ruh ïa ka jingdonkam ban thaw ïa ki kynhun kiba don ka jingaiti lut bad ban kynthup ïa ki briew kiba don shisha ïa ka jingthrang ban wanrah ïa ka jingkylla. U la ong ba wat tang ka kynhun rit jong ki briew kiba trei shitom ruh ka lah ban pynshlur ïa kiwei bad thaw ïa ka sawdong sawkun kaba paka ban trei.
U la kdew ruh ïa ka jingkylla ha ka rukom trei kam jong ka Sorkar Meghalaya ha kine ki phra snem ba la dep, da kaba ong ba kane ka jingkiew ka la wan lyngba ka jingaiti lut, ka jingïatreilang bad ka jingkhlaiñ ka jingshaniah ha ka bor jong ka Jylla hi.
Haba pdiang ïa ka jingshisha ba Meghalaya ka dang ïakynduh ïa ki jingeh ha ki katto katne ki bynta jong ka roi ka par haba ïanujor ha ka Ri baroh kawei, u Himanta u la ong ba ym donkam ban duh jingkyrmen, lada ki paidbah ki pdiang ïa ka jingshisha bad trei shitom ban pynbeit ïa ki jingeh.
U la pynpaw ruh ba ka Meghalaya ka la sdang ban ïoh ïa ka jingithuh ha ka ri baroh kawei, ha kaba ka ophis jong u Myntri Rangbahduh ka Ri ka la pan jingtip halor katto katne ki prokram jong ka Jylla, bad ka Jylla ka la shah khot ruh ban ïasam ïa ki jingshem jong ka bad kiwei pat ki Jylla.
U la kdew kyrpang ïa ki prokram jong ka Meghalaya ha ka liang ka jingroi jong ki khyllung bad ki khynnah rit, khamtam ïa ka 1,000 Days Programme, kaba peit ïa ka koit ka khiah bad ka jingroi jong ki khynnah ha ki sngi ba nyngkong jong ka jingim.
U la ong ba ka jingbei tyngka ha ki khynnah mynta ka sngi ka long kaba kongsan ban tei ïa ka bor briew kaba donkam na ka bynta ka India kaba la kiew ha u snem 2047, namar ka pateng ban wan kan sa lamkhmat ïa ki jaka treikam jong ka ri, ka ïoh ka kot bad ka imlang sahlang.