Da lah mynjur u Lat ka jylla ïa ka jingphiah Constituency, yn pynlong election ha GHADC

Shillong, Naiwieng 14: U Symbud Myntri Rangbah ba khmih ïa ka Tnad District Council Affairs (DCA) Bah Prestone Tynsong ula pyntip ba ïa ka tarik ban pynlong ïa ka elekshon ha Garo Hills Autonomous District Council (GHADC) yn sa shim rai hadien ba pyndep ïa ka jingpynbeit ryntih ïa ki constituency bad ioh jingmynjur na u Lat.
U Bah Prestone ula ong ba u dang shu ioh jingtip ba ïa ka kaiphod pynbeit ryntih ïa ki constituency, lah dep ban pynkhreh bad mynta kan iaid lyngba ki kam kiba hap ban pyndep kat kum ka riti synshar.
“Nga dang shu ioh jingtip ba ïa ka kaiphlod lah dep ban pynkhreh bad ïa kane ka kaiphod hap ban aiti sha ka District Council” ula ong.
Ula batai ba hadien bala wanrah ïa ka kaiphod hapoh ka Council, ka Executive Committee jong ka GHADC kan sa shong bishar bniah bad sa wanrah hapoh ka Iingdorbar ban ioh jingmynjur.
“Shisien ba ka EC jong ka GHADC kala dep bishar lut nadong hadong, kin sa wanrah hapoh ka ïingdorbar bad ka ïingdorbar kan sa mynjur ïa ka” ula ong.
Hadien ba mynjur ka ïingdorbar ïa ka kaiphod, yn sa phah pat sha ka Sorkar, ka ban sa phah ruh ïa ka sha u Lat ban ai jingmynjur.
Ula ïathuh ba ïa ka tarik jong ka elekshon yn sa rai hadien ba la pyndep lut ïa kine ki kam ba hap ban leh kat kum ka riti synshar.